Jerasaun Patriota apela ba Joven hadook-an husi violénsia hodi kontribui ba pás
DILI, 23 Maiu 2025 (TATOLI)–Jerasaun Patriota, Hermínio Xavier, apela joven timoroan atu hadook-an husi prátika violénsia no konflitu hodi kontribui ba pás no estabilidade iha rai-laran.
“Kontribui liuhusi ida-idak nia papel, maibé nia objetivu mak hakarak kria nasaun ne’e la’o ho pás no estabilidade, labele hamosu konflitu hodi impede ita-nia dezenvolvimentu,” Hermínio Xavier hato’o iha salaun Ministériu Defeza, Sesta ne’e.
Nia nota, durante ne’e joven sira kontinua kontribui ba instabilidade iha rai-laran.
“Tanba joven sira menus tebes asesu ba edukasaun no informasaun, entaun dalaruma ita la kle’an iha komprensaun oinsá kontribui ba kria pás no estabilidade iha ita-nia rai,” nia akresenta.
Notísia relevante : PM Xanana: Governu sei foti desizaun taka totál atividade GAM
Tuir Hermínio Xavier, situasaun agora maka nafatin hasoru krize tanba joven sira la kontribui ba unidade hodi kria nasaun ne’e ladi’ak no instrumentaliza-an iha organizasaun oinoin.
“Maibé, buat sira ne’e hotu ami ko’alia la’ós atu julga arte-marsiál, maibé arte-marsiál ne’e di’ak, só que joven sira liuliu ami-nia joven ho idade kiik sira dalaruma nia komprensaun ladun luan,” nia katak.
Jerasaun Patriota ne’e observa, bainhira sira envolve iha organizasaun sira maka iha tendénsia hakarak halo funu ne’ebé la’ós hasoru ema seluk, maibé hasoru sira-nia maun alin rasik, hahú husi uma-laran to’o sosiedade.
Jornalista : Nelson de Sousa
Editora : Julia Chatarina
