BOBONARU, 23 Maiu 2025 (TATOLI)—Servisu Munisipál Agua Saneamentu no Ambiente (SMASA) autoridade Munisípiu Bobonaru, foin lalais ne’e, kanaliza ona bee-moos ba Sentru Saúde Komunitária (SSK) Kakanea, suku Lourba, postu administrativu Bobonaru, munisípiu Bobonaru.
Notísia Relevante: Sentru Saúde Kakanea iha Lourba la asesu bee-moos
Diretór SMASA Munisípiu Bobonaru, Armindo Cardoso Barros, hateten kanalizasaum bee-moos ne’e atu fasilita pesoál saúde sira utiliza ba nesesidade sanitária no halo atendementu ba pasiente sira liuliu inan isin-rua sira atu partu.
“Sentru saude Kakanea durante ne’e halerik ba bee-moos, ho ida-ne’e, SMASA ho ekipa identifika no avalia. Ho rezultadu ida-ne’e, postu saúde Kakanea asesu ona bee-moos,” nia hateten.
Reprezentante komunidade Lourba, Anita de Jesus, hato’o agradesementu ba SMASA tanba durante tinan barak ona SSK Kakanea la asesu bee-mos.
“Ami ba konsulta ruma, presiza atu ba toilet bee laiha, entaun pasiensia ba fali ema-nia uma nesik ne’e para husu ajuda de’it ona. Doutór sira iha ne’e mós dalaruma na’in kuru bee de’it mak ba haris fatin. Tempu udan, sira uza udan-been de’it maibé bai’loro fali araska loos. Agora, sira dada bee ba ona ne’e, ita sente di’ak ona, Presiza bee ruma ne’e, la presiza la’o do’ok tan,” nia hateten.
Enkuantu atendementu saúde SSK Kakanea kobre suku sia (9), aldeia 31 no provizóriu halo mós atendementu emerjénsía ba komunidade iha suku Atara, Obulo, postu administrativu Atsabe, munisípiu Ermera no suku Lepo, postu administrativu Zumalai, munisípiu Kovalima, tanba kondisaun estrada iha suku viziñu la permite.
Notísia Relevante: ONG Frontline konstrui sala-maternidade iha SSK Kakanea Lourba
Jornalista : Sergio da Cruz
Editór : Cancio Ximenes
