BOBONARU, 05 Juñu 2025 (TATOLI)—Komunidade ho dirijente eskola husu ba Ministériu Edukasaun (ME) atu tau matan ba kondisaun Infraestrutura eskolár iha Ensinu Báziku Filiál (EBF) Oat Kaboke, suku Ritabou, postu administrativu Maliana, munisípiu Bobonaru.
Notísia Relevante: ME sei konstrui saladeaula 42 ba eskola Ensinu Báziku
Koordenadór EBF Oat Kaboke, Florindo dos Reis Barreto, konfirma kondisaun eskola atuál la seguru ba estudante ho sira atu partisipa prosesu ensinu no aprendizajen liuliu iha tempu udan no anin-boot.
“Haree ami-nia plafon, zinku ho ai sira a’at hotu ona. Iha tinan 2022, sira mai sukat ona maibé seidauk iha rezultadu. Nune’e, ami husu Governu atu tau matan ba ami-nia eskola ne’e tanba mi atu hadi’a ho orsamentu Konsensoens eskolár labele, tanba númeru estudante uituan no osan la to’o atu hadi’ak dala ida,” Nia informa ba Agência Tatoli, iha nia kna’ar fatin, kinta ne’e
Nia informa, saladeaula mós la sufisiente atu fahe estudante sira tuir ida-idak nia klase, tanba eskola ho totál saladeaula rua konstrui iha tinan 2016 husi atuál Prezidente Repúblika, José Ramos Horta ne’ebé iha momentu ne’ebá sei asume pozisaun hanesan membru Governu.
“Ami-nia aula fahe ba dad4er hotu, tanba ami-nia profesór mós na’in-tolu de’it entaun ami hanorin multi-klase. Ami kahur hamutuk de’it, primeiru anu no segundu anu hamutuk, terseiru anu ho kuartu anu hamutuk iha sala ida. Atu fahe dadeer ho lorokraik labele, tanba númeru estudante uitoan no sala la to’o, entaun ami ezije aumenta sala rua,” nia dehan.
Reprezentante komunidade, Sebastiana Godinho Pereirra, rekomenda be Ministériu Edukasaun atu konsidera problema ne’e iha planu orsamentu tinan 2026 hodi bele rezolve.
Reprezentante Familia ne’e mós sente triste no preokupa tanba kondisaun infraestrutura eskola ne’e bele fó ameasa ba estudante sira-nia vida.
“Agora sira atu estuda ba mós ladi’ak, sira tama hamutuk de’it fatin la to’o. Depois, eskola mós la di’ak ona, odomatan, janela, zinku plafon sira mós a’at hotu ona. Tempu udan ne’e, mestre sira jaga de’it estudante sira. Anin-boot ne’e zinku loke-ean, udan tama tan sira, ne’e sente la di’ak, ami-nia oan sira bele hetan dezastre. Ami husu atu halo foun, nune’e labarik sira ba eskola labele tauk,” nia hateten.
Enkuantu tuir dadus tinan letivu 2025 ne’e, totál estudante EBF Oat Kaboke hamutuk 64 husi Primeiru anu to’o kuartu anu.
Notísia Relevante: ME notifika ona eskola ne’ebé nia infraestrutura la adekuadu
Jornalista : Sergio da Cruz
Editór : Cancio Ximenes
