OJE 2025, Autoridade RAEOA ezekuta ona 22%
OEKUSI, 11 Juñu (TATOLI) – Husi fulan Janeiru mai to’o Juñu, Autoridade Rejiaun Administrativa Espesiál Oekusi Ambeno (RAEOA), lideradu Rogério Tiago Lobato, ezekuta ona Orsamentu Jerál Estadu (OJE) 2025 nian atinje ona 22%, husi orsamentu hamutuk millaun $62.181.000.00.
“Ohin ami reuniaun atu ko’alia kona-ba ezekusaun orsamentu, ita-nian durante fulan-ne’en nia laran ne’e to’o ona 22%, maibé loloos tenke liu ida-ne’e, maibé ita-nia ezekusaun kompara ho munisipíu hotu, ita-nia ezekusaun di’ak, tan ne’e ami sei halo esforsa atu fulan-ne’e, ho oin ami bele hasa’e ezekusaun ba to’o 50%, hakarak mak ne’e, ezekusaun ne’e to’o tinan ikus bele to’o 90%, maibé ami presiza halo esforsa maka’as,” dehan Rogério Lobato ba jornalista sira iha Oekusi, ohin.
Notísia relevante:PM Xanana agradese Bankada Parlamentár ne’ebé aprova OJE 2025
Nia esplika, husi 22% ne’e, ezekuta ba kategória hotu, tuun liu mak iha kapitál dezenvolvimentu, tanba iha osan millaun $7, maibé foin mak ezekuta millaun $1-resin.
PA RAEOA ne’e promete katak, hahú husi fulan Juñu to’o Jullu 2025 ne’e, Autoridade RAEOA sei esforsa atu halo pagamentu ba projetu emerjénsia sira, nune’e bele hasa’e ezekusaun iha kapitál dezenvolvimentu.
“Ne’ebé husi 22% ne’e ba RAEOA tomak nia atividade husi Sekretariu Rejional sira hotu,” nia hateten.
Entretantu, iha proposta OJE 2025 ba RAEOA iha millaun $62, ne’ebé millaun $36,001,473.00 ba autoridade RAEOA no $26,179,527 ba Fundu Espesiál Dezenvolvimentu (FED).
Alokasaun proposta OJE 2025 ba autoridade $36,001,473 ne’e, hodi aloka ba saláriu vensimentu $14,662,131.00, bens no serbisu $10,125,289.00, transferénsia públika $4,214,053.00 no kapitál dezenvolvimentu $7,000,000.00.
Tuir dokumentu livru proposta OJE Volume II: RAEOA- ZEEDOA, haktuir katak jeralmente, alokasaun orsamentu ba RAOEA-ZEEDOA ho objetivu atu kria abordajen ida-neʼebé ekilibradu ba dezenvolvimentu hodi hatán ba nesesidade imediata no perspetiva kreximentu ba tempu naruk, foku ba infraestrutura, kapitál umanu no diversifikasaun ekonómika, kombina ho esforsu atu hametin instituisaun sira no promove inkluzaun sosiál, hodi kontribui ho pozitivu ba dezenvolvimentu jerál territóriu RAEOA no ZEESM nian.
Notisia relevante:MF halo konsulta sidadania ba preparasaun planu orsamentu 2026
Jornalista: Abílio Elo Nini
Editór: Florencio Miranda Ximenes
