KOVALIMA, 12 Juñu 2025 (TATOLI) – Diretór Servisu Saúde Munisípiu Kovalima, Domingos Sequeira konsidera katak inan isin-rua sira iha ona koñesementu tanba partu ona iha sentru saúde no postu saúde ne’ebé besik sira.
Razaun iha koñesementu, tuir ezekutivu ne’e, tanba bazeia ba dadus iha trimestre ba dahuluk ne’e hatudu katak inan isin-rua 20% ekivalente númeru 200-resin mak partu ona iha estabelesimentu saúde sira.
“Trimestre ba dahuluk, 20% inan isin-rua partu iha sentru saúde no postu saúde, signifika maioria iha ona koñesementu bainhira atu partu tenke hakat ba postu saúde no sentru saúde”, Domingos Sequeira, relata dadus ne’e ba jornalista iha Kamanasa, ohin.
Notísia relevante: https://tatoli.tl/2025/01/10/inan-isin-rua-9-mak-partu-deit-iha-uma-saude-covalima/
Tuir loloos kada trimestre, inan isin-rua 25% tenke partu iha fasilidade saúde maibé trimestre ba dahuluk foin atinji 20% inan isin-rua partu iha fasilidade saúde enkuantu 5% mak inan isin-rua partu iha uma.
“Ita analiza tinan ida atu atinji 100% inan isin-rua partu iha fasilidade saúde entaun kada trimesterál tenke atinji 25% depende ita-nia konsiénsia dala ruma mós inan isin-rua balun kanotak moras derrepente bainhira ambulánsia to’o partu ona iha uma”, nia informa.
Bazeia ba alvu, kada fulan, inan isin-rua partu iha fasilidade saúde inan isin-rua 300-resin signifika fulan tolu na’in-900 maibé atinji 20% signifika barak liu mak partu ona iha fasilidade saúde.
Fó hanoin fali katak bazeia ba avaliasaun iha 2024 ne’e inan isin-rua 9% ekivalente ho númeru 165 mak partu iha uma, la ba partu iha fasilidade saúde.
Jornalista:Celestina Teles
Editór: Rafael Ximenes de A. Belo
