Governu lansa kampaña semana nutrisaun iha Bobonaru
BOBONARU, 25 Juñu 2025 (TATOLI)—Governu liuhusi Ministériu Saúde (MS), kuarta ne’e, hamutuk ho autoridade Munisípiu Bobonaru lansa kampaña nasionál semana nutrisaun iha suku Tapo-Memo, postu administrativu Maliana, munisípiu Bobonaru ho “Tema Han Ai-han nutritivu, moris saudavél”.
“Objetivu husi lansamentu kampaña nasional semana nutrisaun mak atu bele garante no monitoriza inan sira ho oan tinan lima (5) mai kraik nia growth monitoring, promove dieta saudável no faze preparasaun ai-han ne’ebé seguru. Sei kontinua sustentabilidade atividade ida-ne’e kada fulan iha primeira semana. Atividade Nutrisaun hanesan atividade importante tebes ba ita nia nasaun Timor-Leste tamba nutrisaun nu’udar sentru ba dezenvolvimentu Nasionál no potensial humanu nian,” Diretora Jerál Kuidadu Saúde Primaria iha MS, Elizabet Leto Mali, informa ba jornalista sira, hafoin halo lansamentu ba programa ne’e.
Mánutrisaun akontese la’ós de’it hafraku individu ida-nia saúde maibe hafraku mós sósiu-ekonómiku nasaun nian, nune’e investe ba saúde nutrisaun hodi bele garante sosiedade ida-ne’ebé saudável no mais rejiliente no presiza rezolve mánutrisaun liuhusi prátika nutrisaun ne’ebé saudável ba oan sira liuhusi aihan lokál sira.
“Agora, ami habelar informasaun ne’e ba munisípiu atu nune’e kada munisípiu bele implementa katak semana nutrisaun ne’e atu dehan iha kada fulan iha semana ida, ita tenke foti iha fulan primeiru no semana primeiru ba komunidade ne’ebé mai iha fasilidade saúde tantu ida moras no la moras. Pesoál saúde sira tenke enkaixa mós programa ne’e hodi fahe informasaun nutrisaun nia ba ema hotu, atu nune’e sira iha koñesementu liga ho nutrisaun ne’e responsabilidade husi ita-aan rasik no ita fámília,” Diretora Jerál Kuidadu Saúde Primaria iha MS, Elizabet Leto Mali, informa ba jornalista sira, hafoin halo lansamentu ba programa ne’e
Bazeia ba rezultau Survey ka Peskiza iha tinan 2020 hatudu katak munisípiu Bobonaru rejista problema raes badak 50,03% ba Krekas 11,08%, tanba ohin mós MS asina paktu konjunta ho Autoridade Munisípiu no liña Ministeriál hotu-hotu iha munisípiu Bobonaru ho objetivu atu halo prevensaun no redús problema mánutrisaun.
“Paktu ne’ebé ita asina ne’e atu hatudu katak problema nutrisaun iha ita-nia nasaun ne’e la’ós MinisteriuSsaúde nian de’it, maibé responsabilidade ita hotu-hotu nian para atu halo prevensaun no redús mánutrisaun,” nia dehan.
Diretór Servisu Munisipál Saúde Bobonaru, Gil Bernardo Vicente, konfirma atu prevene no redús problema mánutrisaun durante ne’e ekipa saúde halo esforsu liuhusi atividade enkontru advokasia ho líder komunitária sira.
Aleinde ne’e. nia hateten, halo promosaun no edukasaun saúde hodi fahe informasaun ba komunidade no halo demo cooking produtu lokál ba labarik idade tinan lima (5) mai kraik, fahe ai-han super-sereál no Mikro-Nutriente rahun oinsá atu hadi’ak labarik sira ba iha estatutu nutrisaun di’ak.
“Liga ho kampaña nutrisaun hakarak fó hatene ba inan-aman sira katak servisu saúde Bobonaru prontu fahe informasaun ba ita-boot sira no kada fulan sentru saúde no postu saúde sira sei vizita ba ita-boot sira-nia fatin. Ami husu ita-boot sira marka prezensa hodi bele mai halo kontrolu ita-nia oan sira-nia estatutu nutrisaun ne’e di’ak ou lae. Ne’e la’ós ba sira moras ne’e de’it, ita la moras mós bele mai,” nia dehan.
Notísia Relevante: TL sei foka problema má-nutrisaun no stunting iha asembleia jerál ONU ba dala 77
Jornalista : Sergio da Cruz
Editór : Cancio Ximenes
