DILI, 01 Jullu 2025 (TATOLI)–Diretór Servisu Selesaun Nasionál Federasaun Futeból Timor-Leste (FFTL). João Maneco Soares Amaral, hateten kontinua mantein treinadór selesaun nasionál Timor-Leste, Simón Elissetche, tanba hatudu prestasaun di’ak iha jogu sira antes ne’e, no nafatin fó konfiansa ba nia hodi lidera ekipa selesaun nasionál seniór no U-23.
Notísia Relevante: Tazakistaun manán Timor-Leste 1-0 iha jogu kualifikasaun tasa Ázia 2027
“Kontratu ne’ebé mak ita atribui ba treinadór Simón, ita fó liberdade ba nia atu deside téknikamente ne’ebé relasaun ho ekipa. Nia mak ema ida-ne’ebé absolutamente deside jogadór sé mak mai, sé mak la mai, nia hakarak saida de’it ba ekipa ida-ne’e, ita buka meiu atu kompleta. Maibé husi parte estrutura mós fó hateten ba nia katak nia mós tenke komprende kondisaun Timor-Leste nian no nia rasik koopera tebes ho ita. Iha jogu sira-ne’e hatudu katak nia iha prestasaun di’ak,” João Maneco Soares Amaral hateten ba Agência TATOLI liuhusi programa “Entrevista Eskluziva” ho topiku “Partisipasaun Selesaun Nasionál iha Jigu Internasionál” iha estúdiu Faról, tersa ne’e.
Nia dehan, treinadór Simón hala’o servisu tuir hela akordu ne’ebé antes ne’e asina ona ho FFTL no alvu ne’ebé FFTL fó ba nia iha jogu rua bainhira Timor-Leste kontra Tazakistaun konsege lakon 1-0 no joga kontra Maldivas manán 1-0.
“Ita nafatin la’o ho akordu ne’ebé mak iha inklui alvu ne’ebé ita fó ba nia katak, kada jogu ami sei diskute hamutuk rezultadu maibé iha jogu kualifikasaun tasa AFC 2027 ne’e, nia mantein iha kuridór alvu ne’ebé mak iha. Husi ne’e mak la’o to’o agora no ekipa solidu tebes,” nia dehan.
Nia hatutan, FFTL daudaun ne’e fó apoiu másimu ba treinadór Simón ho nia ekipa atu prepara selesaun nasionál ho kualidade no bele lori rezultadu di’ak mai Timor-Leste iha jogu internasionál sira.
Notísia Relevante: Futebolista João Pedro sai “Man of The Match” iha jogu kontra Maldivas
Jornalista : Hortencio Sanchez
Editór : Cancio Ximenes
