Janeiru to’o Juñu, DRTP Oekusi rejista kazu disputa rai 77
OEKUSI, 03 Jullu 2025 (TATOLI) – Hahú husi fulan-Janeiru to’o Juñu 2025 ne’e, Diresaun Rejionál Terras no Propriedade (DRTP) liuhusi Departamentu Rejistu Deklarasaun Disputa Terras, iha Rejiaun Administrativa Espesiál Oekusi Ambeno (RAEOA) rejistu kazu disputa rai hamutuk 77, maioria problema partikular.
Responsavel Rejistu Deklarasaun Disputa Rai iha Diresaun Rejionál Terra no Prorpriedade Oekusi, José Sigueira, informa, númeru kazu disputa rai-ne’e, rejista iha sub-rejiaun haat, hahú husi Pássabe, Nítibe, Oésilo, maibé barakliu mak husi Pante Makasar.
“Husi kazu sira-ne’e, parte Terra no Propriedade fasilita ona mediasaun. Ita hatene katak prosesu mediasaun ne’e la’ós Terra no Propriedade mak foti desizaun, maibe ita fasilita de’it atu parte rua buka sira-nia solusaun ho justifikasaun, ne’ebé kazu sira-ne’e maioria problema família ka problema partikulár,” José Sigueira, dehan iha Oekusi, ohin.
Notísia relevante:DRTP Oekusi sei notifika abitante okupa área risku ba dezastre naturál
Nia informa katak durante kazu sira-ne’e rejista, DRTP halo ona mediasaun ba kazu 26 no 23 iha ona akordu, só tolu mak enkamiña ona ba iha Komisaun Terra no Propriedade tanba disputa ne’e entre família uma-laran no ida hasoru Estadu.
“Tipu kazu sira-ne’e akontese balun problema partikulár, ema ho ema hadau malu rai Estadu, balu reklama grupu ho grupu no balu reklama rai individuál hasoru Estadu nian,” nia informa iha Oekusi, ohin.
Tuir nia, kazu sira ne’e tipu oioin, balun reklama ba Estadu katak rai eransa, dezde uluk sira-nia avo ninian, nune’e parte terra no propriedade enkamiña direita komisaun terra iha nasionál mak haree hodi fó resposta.
“Durante ne’e ami iha Oekusi, rezolve de’it kazu disputa rai ba komunidade entre individuál ka Governu ho individuál, ne’ebé ami hala’o atividade ne’e tuir lei númeru 1/2003 no lei númeru 13/2017, kona-ba rai ne’ebé uluk identifika ona katak tama ba Estadu nian,” nia hateten.
Lei númeru 1/2003 ne’e kona-ba Réjime Jurídiku Bens Imóveis (Estabelese regras klaru ba titularidade, okupasaun, no utilizasaun rai no edifísiu sira iha Timor-Leste, inklui protesaun patrimóniu públiku – objetivu prinsipál) no Lei n.º 13/2017 – Rejime Espesiál ba Definisaun Titularidade Bens Imóveis (Timor-Leste).
Notísia relevante: https://tatoli.tl/2024/09/25/komisaun-terra-no-propriedade-introdus-rejime-juridiku-direitu-bens-imoveis-iha-oe-cusse/
Nia hateten, husi kazu disputa rai 77 ne’e, ekipa terra no propriedade nota iha kooperasaun di’ak entre komunidade sira tanba bainhira hala’o diálogu atu buka solusaun, laiha dezentendimentu fíziku ka uza kro’at maibé rezolve tuir kultura Oekusi nian, liuhusi nahe biti bo’ot.
“Ne’ebé iha ne’e, laiha problema kona-ba oho malu, baku malu tan de’it hadau rai, só iha mak istória malu, maibé depois rezolve dalaruma lori ba sede suku, kuandu hetan ona solusaun, depois laiha ona problema kontinuasaun,” nia dehan.
Notísia relevante:Janeiru to’o Marsu, DRTP Oekusi arrekada reseita rihun $11 ba kofre Estadu
Jornalista: Abílio Elo Nini
Editór: Rafael Ximenes de A. Belo
