DILI, 03 Jullu 2025 (TATOLI)-Governu liuhusi Ministru Juventude, Desportu, Arte no Kultura (MJDAK) no Prezidente Autoridade Nasionál Petróleu klarifika prosesu konstrusaun biblioteka nasionál ne’ebé lansa ona.
“Ha’u dehan ona seidauk bele hatete, tanba desizaun seidauk foti, ita labele pronúnsia mesak, tanba iha ne’e SEAK no empreza no ami bainhira konklui bele fó sai ona”, Prezidente ANP, Gualdinho do Carmo da Silva, hatete iha Palásiu Governu, ohin.
Notísia relevante : ANP–Eni-SEAK lansa projetu Biblioteka Nasionál
Enkuantu Ministru JDAK, Nelyo Isaac Sarmento, hateten avaliasaun ba kontratór sira-ne’e la’ós maihusi de’it Governu maibé mós hosi empreza, entaun nia prosesu ba manán projetu biblioteka nasionál ne’e seidauk finaliza.
“Prosesu la’o hela, hein desizaun ba empreza nian, no prosesu halo avaliasaun ba ida-ne’e. Tanba avaliasaun la’ós maihusi governu de’it maibé hosi osan nain mak empreza ENI Timor-Leste mós sai juri ba avaliasaun ne’e, entaun atu halo desizaun mak juri sira sei dada malu hela”, ministru dehan.
Governante ne’e realsa tinan ne’e tenke iha ona rezultadu kontratór ba projetu biblioteka nasionál. “Kuandu tinan-ne’e seidauk remata mak imi bele lori fali imi nia osan ba, ami la presiza ona, ami bele fali seluk. Ida-ne’ebé mak desizaun governu”.
Antes iha Novembru 2024, Vise Prezidente ANP, Quintino Pereira Bere, hateten ANP hahú ona prosesu avaliasaun dokumentu husi kontratór neen neʼebé partisipa iha konkursu públiku.
Projetu ne’e nia totál finansiamentu millaun $12,7, maihusi operadór ENI millaun $10 no Sekretaria Estadu Arte Kultura (SEAK) millaun $2,7. ANP jere prosesu konkursu públiku ho koordenasaun husi Komisaun Nasionál Aprovizionamentu (CNA, sigla portugés), maibé bainhira projetu ramata sei entrega ba SEAK.
“Prosesu loke konstrusaun biblioteka nasionál ho nia kustu millaun $12-resin. Konstrusaun biblioteka nasionál ne’e nia kritériu husi CNA no ANP. Ita loke ba públiku durante fulan-ida nia-laran hodi kontratór sira submete sira-nia dokumentu, building technical, building financial, neʼebé sira submete no ohin loron 22 novembru ita loke dokumentu, nune’e ita presiza domingu tolu (semana tolu) hodi halo prosesu evaluasaun ba sira-nia dokumentu”, katak nia.
Notísia relevante: ANP hahú evaluasaun dokumentu husi kontratór neen ba konstrusaun biblioteka nasionál
Jornalista : Osória Marques
Editora : Rita Almeida
