DILI, 14 Jullu 2025 (TATOLI)—Eskola Ensinu Báziku Sentrál (EBC, sigla portugés) Remenaru iha munisípiu Manatutu seidauk simu konsensaun eskolár iha períodu daruak tanba falla iha relatóriu.
“Kondisaun ne’e sei prejudika mós ba preparasaun ezame períodu daruak nian tanba liuhusi konsensaun eskolár mak bele sosa tinta, surat-tahan, no materiál seluk tan. Konsensaun eskolár ba tinan ida-ne’e di’ak, ita falla de’it iha eskola ensinu báziku sentrál Remaneru, postu administrativu Lakló, ninia problema ne’e mak relatóriu, tanba ne’e difikulta tiha implementasaun liuliu ba preparasaun ezame períodu daruak nian,” Diretór Servisu Edukasaun munisípiu Manatutu, Patrício da Cruz Quintão, informa ba Ajénsia TATOLI, iha edifísiu Ministériu Negósiu Estranjeiru no Kooperasaun (MNEK), Praia dos Coqueiros, Segunda ne’e.
Notísia relevante : Osan konsensaun eskolár tama ona konta eskola
Servisu Edukasaun Manatutu tenta hela atu aselera prosesu atu nune’e sira bele hetan sira-nia orsamentu.
“Parte inspesaun husi Ministériu no fiskalizasaun komunika ona ho Diretór Eskola atubele submete sira-nia relatóriu. Ita garante Eskola sira seluk bele la’o ho di’ak, tanba maioria sira ezekuta ona orsamentu husi konsesaun eskolár ho di’ak,” nia akresenta.
Diretór dehan, eskola sira hasoru problema iha elaborasaun relatóriu, tanba tinan uluk ba orsamentu bainhira selebra kontratu hotu implemeta kedan no eskola hotu hatama relatóriu.
Nia adianta tinan uluk hein eskola hotu-hotu nia relatóriu tama tiha, hafoin implementa dala ida de’it,maibé tinan ida ne’e labele hein, eskola mak nia relatóriu atrazu, entaun difikulta fali eskola seluk.
“Entaun, tinan ne’e ita bazeia ba relatóriu husi kada eskola, kuandu submete ona ita prosesa kedas nune’e eskola bele halo preparasaun másima ba ezame sira,” nia katak.
Jornalista : Osória Marques
Editora : Julia Chatarina
