OEKUSI, 04 Agostu 2025 (TATOLI) – Konstrusaun ponte alternativa ida lokaliza iha bairru Biseob suku Abani sub-rejiaun Pássabe, Rejiaun Administrativa Espesiál Oekusi Ambeno (RAEOA), konklui ona hosi empreza konstrutora Bumen Unipesoál Lda.
Tan ne’e, Prezidente Autoridade RAEOA, Rogério Tiago Lobato, akompaña husi Diretór Diresaun Rejionál Infraestrutura (DRI), hala’o fiskalizasaun no inspesaun ikus liuliu ba kondisaun no kualidade antes entrega Governu.
Notísia relevante:Abríl, Empreza finaliza konstrusaun ponte alternativa iha suku Abani
Diretór Diresaun Rejionál Infraestrutura, Remígio Nuno Sila, esplika, ponte alternativa ne’e atu liga komunidade sira iha aldeia Pássabe ba sentru saúde no Eskola Bázika Sentrál (EBC,sigla portugés) Pássabe no mós ba aldeia Haemnanu kontinua ba suku Malelat inklui liga postu Polísia Unidade Patrullamentu Fronteira (UPF) Krúz.
“Ponte ne’e tama iha projetu emerjénsia KAFI rejionál daruak, agora servisu konklui ona. Ita hein katak empreza sei entrega iha tempu-badak,” nia hateten, iha sub-rejiaun Pássabe.
Antes ne’e, Xefe Suku Abani, Carlos Elo, informa katak ponte referida kondisaun aat tinan rua ona, maibé tinan kotuk to’o agora Autoride konsege rezolve ona.
“Durante ne’e karreta motor labele liu, kuandu ultrapasa ba buka fali dalan foun, triste tanba ponte liga ba postu saúde, maibé ha’u orgullu tanba Autoridade RAEOA fó ona solusaun, nune’e komunidade no transporte sira bele asesu fila-fali hanesan uluk,” nia hateten.
Notísia relevante:CAC kontinua kontrola kualidade projetu KAFI rejionál iha Oekusi
Projetu ne’e, implementa hosi kompañia lokál Bumen Unipesoál Lda ho nia valór kontratu $39,812.76 ho durasaun serbisu fulan tolu, tanba tipu projetu referidu ho kategoria emerjénsia, ne’ebé aprova husi Konsellu Administrasaun Fundu Infraestrutura (KAFI) Oekusi nian.
Jornalista: Abílio Elo Nini
Editór: Rafael Ximenes de A. Belo
