Desizaun traballadór timoroan servisu iha Korea ne’e la’ós husi SEFOPE
DILI, 18 Agostu 2025 (TATOLI)—Sekretariu Estadu Formasaun Profesionál no Empregu (SEFOPE), Rogério de Araújo Mendonça, esplika prosesu rekrutamentu traballadór timoroan sira atu servisu iha Korea ne’e la’ós desizaun husi SEFOPE maibé diretamente husi Dirasaun Rekursu Umanu (HRD) Korea.
Notísia Relevante: SEFOPE despede traballadór 104 atu ba servisu iha Korea
“Ha’u hanoin husi parte embaixada, adidu ho SEFOPE rasik mós esforsu maka’as tebe-tebes katak ita-nia kandidatu sira-ne’ebé maka liu ona ne’e presiza halo nafatin kontaktu ho HRD Korea, nomós empregadór sira hodi hetan oportunidade,” Sekretáriu Estadu ne’e informa ba jornalista sira iha salaun VIP SEFOPE, Kaikoli, ohin.
Loloos, nia dehn, SEFOPE mós reklama hela maibé husi HRD Korea mak fó kuantidade ida-ne’ebé limitadu, entaun SEFOPE sei hein no la’ós dehan traballadór sira la ba ona ne’e lae, maibé sei fazeadamente.
“Tanba, kuota ba nasaun hira ne’ebé sira presiza ne’e ho kuantidade ne’ebe mak boot. Signifika katak balun ne’ebé mak seidauk ba ne’e sei hetan fali oportunidade iha futuru oin mai,” nia dehan.
Aleinde ne’e, nia mós informa ba públiku kona-ba protesta valór ki’ik maibé bele ba servisu iha Austrália, kestaun ida-ne’e públiku tenke haree informasaun ho di’ak uitoan kona-ba traballadór balun ne’ebé valór ki’ik maibé bele ba servisu iha Austrália, tanba SEFOPE iha ninia sistema.
“Kandidatu balun ne’ebé sente katak iha ezame hetan valór ki’ik, no ladun satisfas ho sira-nia valór ne’ebé iha bele halo reklamasaun,” nia informa.
Tuir dadus ne’ebé Sekretáriu Estadu ne’e simu husi dirasaun sira hateten iha kandidatu na’in-100 resin mak halo reklamasaun no kandidatu ida-ne’ebé agora daudaun servisu iha Austrália ne’e nian mós hola parte iha lista dadus reklmaasaun ne’e hotu.
“Ha’u hateten ba públiku katak, ha’u mós rona dehan traballadór ne’e mai husi munisípiu Vikeke, entaun ha’u hanoin katak prosesu sira hanesan ne’e ita buka hodi haree fila-fali faktu loloos katak ninia valór menus mak nia ba ne’e ka husi faze reklamasaun ne’e,” nia dehan.
Notísia Relevante: SEFOPE despede traballadór timoroan 29 ba servisu iha Korea
Jornalista : Alexandra da Costa
Editór : Cancio Ximenes
