OEKUSI, 02 Setembru 2025 (TATOLI) – Progresu serbisu ba reabilitasaun estrada rurál kilometru 19,7, ne’ebé implementa husi kompañia Timor-Lorosa’e Unipesoal Lda hahú husi mota Noél-Ekat suku Bobometo sub-rejiaun Oésilo to’o fronteira Haumeni-Ana suku Abani sub-rejiaun Pássabe daudaun ne’e atinje ona 70% no tuir planu sei konklui antes udan monu rai.
Notísia relevante:PA RAEOA nota reabilitasaun estrada rurál iha Oésilo-Pássabe laiha kualidade
José dos Reis, nu’udar enjeñeiru ba kompañia Timorlorosa’e, informa katak, Governu fó fiar hodi reabilita estrada, tantu hadi’a no aterru husi Noél-Ekat ba to’o fronteira Haumeni-Ana, ho nia distánsia kilometru 19,7 ho nia luan metru hitu (7), metru lima (5) ba estrada no metru rua (2) rezerva ba bee-dalan.
“Ne’ebé ami aterru ona estrada ne’e nia progresu 70% ba aterru de’it, no loke luan mós atinje ona 90%. Ida-ne’e mak progresu serbisu ne’ebé daudaun ami hala’o hela, tanba ami hahú projetu ne’e iha Novembru tinan kotuk, maibé difikuldade mak udan no mós materiál, tanba husi mota Noél-Ekat mai to’o Pássabe ami foti materiál ho kualidade di’ak atu ateru, iha kedas Oélanas ba to’o Pássabe do’ok ho distánsia 17 kilometru,” nia hateten iha suku Abani, ohin.
Nu’udar enjiñeiru, nia promete antes udan monu rai projetu referidu sei konklui, tanba trosu ida husi Hau-Ana suku Usitasa’e mai to’o Tumin suku Bobometu konklui antes ona.
Nia esplika, materiál ne’ebé uza hodi garante kualidade estrada, kompañia uza item haat, mak hanesan, aterru, loke luan estrada, hamoos drainajen no valeta sira no mós halo valeta.
Tuir nia, kona-ba traballadór maioria Oekusi-oan, ezetu motorista tanba transporte sira liuliu karreta tanba modelu foun no konsege loke rekrutamentu públiku maibé durante fulan tolu la konsege hetan tanba motorista barak laiha esperiénsia másimu liuliu dokumentu hanesan karta kondusaun.
“Maibé ba konstribuisaun komunidade sira, ami orgullu tebes, tanba bainhira ita kee iha sira-nia uma oin, laiha dezentendimentu, liuliu lutu no ai-oan balun hetan estragu, tanba ekipa husi autoridade lokál hamutuk Governu identifika ona no alista kedas, antes ami halo luan estrada,” nia orgullu.
Notísia relevante:PA RAEOA orienta empreza sira atu nahe estrada rurál ho simentu
Xefe Suku Bobometo, José Labi Caet, agradese tanba projetu ne’e ho kategoria emerjénsia, konsege responde duni preokupasaun komunidade sira, tanba hein tinan barak atu hadi’a estrada rurál sira iha área rurál atu fasilita movimentu ema ho transporte sira.
“Uluk, Prezidente Autoridade mai to’o ha’u-nia suku no observa, agora maske nia sai ona maibé ami agradese tanba dalan sira-ne’e kee moos no hadi’a hotu, entaun ami espera Governu kontinua tau matan nafatin atu hadi’a estrada sira iha foho, tanba ne’e nia impkatu direita ba ita ema atu la’o mai ho motor no karreta sira asesu ba to’o Oekusi vila, tantu tempu bailoron no tempu udan,” nia orgullu.
Notísia relevante:Primeiru-Ministru orienta autoridade RAEOA prepara dezeñu harii ponte iha mota Noel-Ekat
Projetu reabilitasaun estrada rurál ne’e hanesan projetu emerjénsia neʼebé aprova husi Konsellu Administrasaun Fundu Infraestrutura (KAFI) rejionál daruak, neʼebé kompañia Timor-Lorosa’e Unipesoál Lda implementa ho valór kontratu $331,877.59, ne’ebé aloka husi fundu infraestrutura nasionál durasaun serbisu fulan-neen ho distánsia kilometru 19,7 hahú husi mota Noél-Ekat, suku Bobometo sub-rejiaun Oésilo to’o suku Abani sub-rejiaun Pássabe.
Jornalista: Abílio Elo Nini
Editór: Rafael Ximenes de A. Belo
