MCI kolleta masin lokál ektare ida ba sentru produsaun Masin iha Oekusi

OEKUSI, 09 Outubru 2026 (TATOLI) – Ministériu Komérsiu no Indústria (MCI) hamutuk ho Autoridade Rejiaun Administrativa Espesiál Oekusi Ambeno (RAEOA), sesta ohin, hala’o seremónia kolleta masin lokál dahuluk ba ektare ida, iha sentru produsaun masin, ne’ebé konstrui iha lagoa Maesmone aldeia Maquelab suku Taiboko sub-rejiaun Pante Makasar.

Notísia relevante:MCI klarifika: Projetu sentru produsaun masin iha Oekusi ‘la’ós’ abandonadu

Ministru Komérsiu no Indústria, Filipo Nino Perreira, hateten katak rezultadu kolleta ne’e fazeadamente, faze tuirmai sei kompleta ba ektare 10, nune’e bele hasa’e produsaun masin iha laran hodi redus importasaun.

“Tenke hasa’e duni produsaun masin iha rai-laran ba iha nesesidade konsumu nian, depois sei haree tan poténsia ne’ebé iha, maibé Oekusi mak nia área boot liu ona, tanba ita tau uluk ektare 10, maibé ohin iha hahú uluk ho ektare ida, tanba iha Manatutu hahú ho ekatre neen, Ulmera ektare lima, Atabae ektare lima,ne’ebé Oekusi ita foin hahú ho ektare ida,” nia hateten iha seremónia kolleta, ne’ebé hala’o iha suku Taiboko, ohin.

Governante ne’e, garante katak, ba polítika dezenvolvimentu masin lokál ne’e nia kontinuasaun ba futuru, presiza kontribuisaun husi povu Oekusi ho Autoridade RAEOA, tanba ne’e iha futuru karik iha indústria ida bele hasa’e nia produsaun ein-pakotementu hodi bele fornese ba iha merkadu nasionál.

“Ita sei akompaña hamutuk nune’e bele to’o faze ida bele prodús no garante nia sustentabilidade, entaun ita presiza duni atu fortifika nia baze produsaun, ha’u hanoin ba konsumu iha rai laran bainhira iha over produsaun maka ita bele halo tan esportasaun,” nia afirma.

Ministru MCI ne’e esklarese katak, produtu masin sai polítika importante, tanba hahú kedas introdús iha IV Governu, Governu fó atensaun ba ida-ne’e, la’ós ko’alia de’it maibé asaun konkreta ne’ebé maka Governu halo investe ba iha infraestrutura, rekursu umanu, no hahú prodús inisíu iha munisipíu Manatuto ho masin naturál husi Laga sai hanesan materia prima, ho téknolojia iha mumentu ne’ebá hahú maibé la konsege, nune’e iha V Governu, kontinua polítika ne’e to’o ohin loron.

Notísia relevante:MCI observa sentru produsaun masin iha Oekusi, prosesu kolleta iha tempu-badak

Iha fatin hanesan, Prezidente Autoridade RAEOA, Régio da Cruz Salu, kompromete katak, investimentu ne’e tenki kontestualiza nu’udar rikusoin povu Oekusi nian, hodi integra ba iha Programa Movimentu Empreendedorizmu.

“Durante ne’e ami foti dezafíu husi Governu atu ami bele akompaña no aprende, ohin iha fatin ne’e, ami bele deklara ba povu no joventude sira, katak ho lansamentu ida-ne’e, ba oin ho Programa Movimentu Empreendedorizmu, ita bele ajuda ona joven no família sira, bele hatutan tan halo produsaun ne’e, tanba ita aprende husi buat ne’e, agora ita tenki kontinua, ne’e mak ami-nia kompromisu, nune’e investimentu ne’e bele kontestualiza nu’udar rikusoin povu Oekusi nian liliu suku Taiboko nian,” nia hateten.

Notísia relevante:RAEOA oferese rai ektare 10 ba MKI estabelese sentru produsaun masin

Entretantu, sentru investimentu produsaun masin ne’e, ezekuta husi kompañia lokál Baimnasi Unipesoal Lda ho valór kontratu rihun $50-resin, neʼebé aloka direita husi Ministériu Komériu Indústria (MCI

Jornalista: Abílio Elo Nini

Editór: Rafael Ximenes de A. Belo