KOVALIMA, 10 setembru 2025 (TATOLI)-Komandante PNTL munisípiu Kovalima, Superintendente Asistente Polísia, Inacio Amaral hateten polísia Kovalima oras ne’e estabelese ona Konsellu Polisiamentu Komunitáriu (KPK) iha suku 20 no falta suku 10 maka seidauk estabelese tanba kestaun laiha orsamentu.
“Ita estabelese nanis KPK iha suku 16, no foin lalais ne’e ita estabelese tan KPK iha suku haat nune’e suku 20 mak iha estabelese ona KPK falta suku 10 mak seidauk estabele maibé depende mós husi orsamentu,” nia hateten ba jornalista sira iha salaun enkontru PNTL Kovalima, ohin.
Notísia Relevante :PNTL Kovalima sei kompleta estrutura KPK iha Suku fazeadamente
Maibe, nia informa kona-ba suku 10 ne’e, parte PNTL Kovalima sei prevee iha orsamentu tinan 2026 hodi estabelese.
Entertantu, iha loron 9 fulan-maiu PNTL Kovalima estabeles KPK husi suku Debos hamutuk 32 no suku Kamenasa 32, ho sira-nia kna’ar maka atu koordena ho PNTL hodi redúz krime iha aldeia no suku.
Munisípiu Kovalima iha postu administrativu hitu ne’ebé maka kompostu hosi postu administrativu Fatululik, Fatumea, Fohorem, Tilomar, Maukatar, Suai no Zumalai ho totál suku 30.
Notísia Relevante :Komandu PNTL Covalima orienta eskuadra divulga informasaun sobre atividade KPK-KSM
Jornalista: Celestina Teles
Editór: Florencio Miranda Ximenes
