KOVALIMA, 14 fevereiru 2025 (TATOLI) –Komandu Polísia Nasionál Timor-Leste (PNTL), munisípiu Kovalima presiza kompleta estrutura Konsellu Polisiamentu Komunitária (KPK), ne’ebé seidauk konsege estabelese hodi apoia servisu Polísia komunitária.
“Kona-ba KPK, fazeadamentu, ba oin ita halo espanda tan KPK, ita sei kontinua suku ne’ebé mak seidauk konsege estabelese estrutura KPK. Ita sei halo kompleta, atu apoiu servisu polisiamentu komunitária bele la’o ho di’ak liután nune’e diminui númeru krime liuhusi medida halo prevensaun krime iha terrenu”, Komandante PNTL Kovalima, Superintendente Asistente, Inacio Amaral hato’o ba jornalista sira, iha Komandu PNTL Kovalima, Santa Rosa, ohin.
Notísia relevante:Komandu PNTL hakarak rekruta membru PNTL ho transparénsia
Nia fó hanoin katak,iha tinan kotuk estabelese ona estrutura KPK iha postu administrativu tolu maibé postu administrativu ne’ebé parte iha foho mak seidauk konsege estabelese.
Ho nune’e espera tinan-2025 ne’e iha orsamentu, bele estabelese ona estrutura KPK iha suku ne’ebé mak tinan kotuk la konsege estabelese iha suku sira.
Munisípiu Kovalima iha nia Postu administrativu Fatululik, Fatumea, Fohorem, Tilomar, Maukatar, Suai no Zumalai, iha nia suku 30, aldeia 148.
Fó hanoin fali katak bazeia ba estatístika kazu ne’ebé rejista iha sistema PNTL iha 2024 hamutuk 229.
Notísia relevante:Komandu PNTL Kovalima halo inspesaun ba motorizada OPS 30
Jornalista:Celestina Teles
Editór :Rafael Ximenes de A Belo
