OEKUSI, 16 Setembru 2025 (TATOLI) – Ministériu Edukasaun hamutuk UN Woman, tersa ne’e, halo abertura atu fortifika Projetu Formasaun Abilidade ba Partisipasaun Ekonómiku (STEP) ba manorin no estudante sira hamutuk na’in-100 iha Rejiaun Administrativa Espesiál Oekusi Ambeno (RAEOA) ho objetivu atu promove ambiente aprendizajen ne’ebé seguru, inkluziva no sensível ba jéneru iha munisípiu.
Diretora Jerál Polítika Planeamentu Inkluzaun no Informátika iha Ministériu Edukasaun, Odilia das Dores Ung. Martins, formasaun ne’e realiza durante loron 50 ho formandu na’in-100 feto okupa na’in-80 no mane na’in-20, ne’ebé alvu ba profesór bolsa kandidatu sira no estudante.
“Intensaun husi formasaun ne’e atu haforsa ekonomia, iha mós materia liga ho atividade lor-loron, hanesan respeita, mudansa atitude sira. Entaun, ita sei envolve mós iha durante formasaun atu sensibiliza ita, tantu estudante no profesór sira-ne’ebé rekrutadu husi bolsa kandidatu, katak hanorin la’ós tenke uza rota, maibé iha maneira atu hanorin,” nia hateten iha salaun edukasaun Oekusi, ohin.
Tuir nia, razaun implementa formasaun ne’e, tanba antes ne’e Ministériu Edukasaun halo ona avaliasaun dezempeñu no observa direita iha terrenu iha Oekusi no Lautein, nesesáriu duni atu hasa’e koñesimentu liuhusi formasaun sira-ne’e.
Tanba ne’e, atu labele prejudika prosesu aprendizajen iha eskola idak-idak, mak parte Ministériu Edukasaun hamutuk ho UN Woman sei realiza formasaun ne’e iha parte lorokraik, no sei apoia mós insentivu kada loron atu fasilita selu transporte.
“Ne’ebé matéria barak ita sei aprende iha périodu fulan rua nia laran, formasaun ne’e mós, Ministériu Edukasaun prepara formadór na’in-10 mai husi ensinu rekorrente no Eskola Tékniku Vokasionál, ho objetivu atu hasa’e koñesimentu bainhira ramata eskola, bele kria rasik kampu traballu, la presiza hein Governu,” nia hateten.
Notísia relevante:UN Woman-ME fortifika STEP ba profesór no estudante iha Lautein-Oekusi
Iha biban ne’e, Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, konsidera formasaun ne’e, importante, tan ne’e nia espera durante formasaun, formandu sira bele hetan koñesimentu foun, nune’e bele implementa iha eskola no atividade lor-loron nian.
“Formasaun ne’e importante tanba atu hakat ka STEP, ha’u nu’udar autoridade só bele reenkuadra de’it, atu programa sira-ne’e bele la’o, ho ema hotu sente katak, formasaun abilidade ne’e, importante no orientadu ba merkadu. Tan ne’e, espera durante formasaun ho tempu loron 50, presiza partisipa ho sériu, nune’e bele hetan buat ruma husi oportunidade ne’e,” nia hateten.
Diretór Edukasaun Oekusi, Vincencio Cono, hateten, promete sei apoia liuhusi observasaun lista prezensa, nune’e formandu sira bele partisipa másimu.
Oportunidade ne’e, prezente bo’ot tebes tanba durasaun kuaze fulan rua, ida-ne’e atu kadi ita-nia kakutak, tanba edukasaun ne’e iha tipu tolu, edukasaun informál katak hahú kedas husi uma laran, edukasaun formál hanesan eskola daudaun to’o universidade no kontinua tan, no ikus mak kursu la’ós formál kursu public speaking, kursu lian portugés no kursu seluk tan, tan ne’e edukasaun sei fó apoia tomak, no sei tau matan mós ba lista prezensa karik profesór ka estudante balun falta, sei husu aprezenta justifikasaun,” nia hateten.
Notísia relevante:ME-UNICEF realiza kolókiu hodi halo revizaun ba setór edukasaun
Jornalista: Abílio Elo Nini
Editór: Rafael Ximenes de A. Belo
