DILI, 29 Setembru 2025 (TATOLI)—Koordenadór Jerál Asuntu Ekonomia iha Ministériu Koordenadór Asuntu Ekonomia (MAKE), Jorge Rei de Carvalho Martins, hateten dezenvolvimentu turizmu ne’ebé di’ak iha rai-laran depende ba infranstrutura bázika, tanba infraestrutura ladi’ak sei fó impaktu ba investimentu turizmu nian.
Notísia Relevante: Fórum Investimentu Turizmu: Timor-Leste halo apelu ba asaun konkreta iha setór turizmu
“Loo duni katak durante ne’e públiku preokupa ho dezenvolvimentu turizmu iha rai-laran, maibé atu dehan de’it katak turizmu la’ós setór individuál maibé nia ne’e setór integradu ne’ebé presiza dalan husi setór sira seluk,” Koordenadór Jerál ne’e informa ba jornalista sira iha nia kna’ar fatin Palásiu Governu, ohin
Governu bele dezenvolve turizmu ne’ebé mak di’ak iha área rurál sira, maibé bainhira fasilidade insfranstrutura bázika hanesan eletrisidade, Estrada, bee-moos no liña internet laiha entaun estimulasaun atu atrai vizitante ne’e laiha tanba kestaun sira-ne’e.
“Governu iha hanoin hela atu setór integradu hotu bele book-an, katak oferese ona fasilidade ne’ebé di’ak entaun ita mós komesa dezenvolve turizmu, tanba turizmu depende ba infraestrutura no polítika rasik,” nia dehan.
Jornalista : Alexandra da Costa
Editór : Cancio Ximenes
