Xanana: “Ita tama ASEAN, ita mak buka hadi’a ita-nia ekonomia”
DILI, 23 Outubru 2025 (TATOLI)–Primeiru-Ministru, Kay Rala Xanana Gusmão, hateten Timor-Leste nia adezaun ba ASEAN la’ós buat hotu nasaun membru sira mak fó apoiu maibé Timor-Leste tenke esforsu rasik hodi hadi’a ekonomia rai-laran.
Notísia Relevante: Vox Pop: TL tenke iha marka rasik kompete iha merkadu ASEAN
“Ita tama ona ba ASEAN, ita asina akordu sira ne’e hotu, maibé ita la’ós hein de’it buat hotu ASEAN mak atu apoiu ita, maibé ita mak buka oinsa hadi’a ita-nia ekonomia,” Xanana hateten ba jornalista sira iha Palásiu Prezidensiál Nicolau Lobato, Bairru Pite, kinta ne’e.
Nia dehan, Timor-Leste labele depende de’it ba nasaun membru ASEAN sira maibé tenke esforsu ho maneira rasik iha kompetisaun sira.
“Ida-ne’e mak ita kria ona Banku Nasionál Dezenvolvimentu Timor-Leste, ita kria atividade oioin iha Dili, ida-ne’e parte ida husi ita-nia preparasaun hodi hadi’a ita-nia ekonomia. Ita harii banku ne’e atu fó apoiu ba timoroan sira atu kreditu hodi bele hasa’e produsaun rai-laran, ita hare timoroan barak kriativu maibé osan mak laiha, entaun ita halo ida-ne’e,” Xanana tenik.
Lider Karismátiku ne’e sublina, Governu estuda hotu ona problema ne’ebé mosu iha territóriu tomak kona-ba oinsá ekonomia la la’o ba oin, ho nune’e mak iha inisiativa kria Banku Nasionál Dezenvolvimentu Timor-Leste.
“Ita estuda hotu ona problema sira-ne’e, nune’e mak kria banku ne’e hodi dezenvolve-aan rasik, hodi dudu ita-nia ekonomia rai-laran, atu labele depende de’it ba ASEAN,” nia dehan.
Notísia Relevante: Dalan ba ASEAN: Governu tenke investe iha setór ekonomia (III)
Jornalista : Hortencio Sanchez
Editór : Cancio Ximenes
