LAUTEIN, 31 Outubru 2025 (TATOLI)—Governu liuhusi Primeiru-Ministru, Kay Rala Xanana Gusmão, no Ministru Obra Públika, Samuel Marçal, kontinua lansa fatuk dahuluk ba projetu reabilitasaun estrada nasionál husi munisípiu Lautein ba postu-administrativu Lospalos ho kilometru 27.980.
Notísia Relevante: PM Xanana lansa fatuk dahuluk reabilita estrada Lautein bá Com
Primeiru-Ministru, Kay Rala Xanana Gusmão, hateten ohin hamutuk iha ne’e hodi haree hamutuk asina akordu entre Governu ho kompañia rua (2) mak ida kona-ba estrada no ida kona-ba bee-moos.
“Hanesan ohin temi tiha ona infraestrutura bázika mak sai fundasi ba dezenvolvimentu hanesan estrada, bee, ponte, eletrisidade. Entaun bainhira buat sira-ne’e mak iha ona, ita bele la’o ba hasoru dezenvolvimentu,” Primeiru-Ministru Xanana hateten iha ninia diskursu serimónia lansamentu fatuk dahuluk reabilitasaun estrada nasionál husi Lautein bá Lospalos, iha Lautein, ohin.
Xanana hatutan, Governu Konstitusionál da-sia (IX) simu orden husi povu hodi halo servisu no hatán ba povu tomak nia halerik
Iha fatin hanesan, Ministru Obra Públika, Samuel Marçal, sente orgullu tebes ho Lospalos-oan sira bele partisipa iha atividade ida-ne’e hatudu katak imi-nia unidade maske iha diferensa polítika maibé iha prosesu dezenvolvimentu imi hotu hamutuk nafatin.
“Ohin, mai iha ne’e atu lansa projetu boot rua mak ida ba estrada no ida seluk mak melloramentu ba fornesimentu bee-moos, ne’ebé ninia prosesu ne’e kuaze tinan ida liu,” Ministru ne’e relata.
Nia dehan, oras tan atu asina kontratu ho kompañia manán-na’in sira iha komunidade nia oin, tanba osan ne’e povu nian entaun tenke envolve ema hotu, tanba ne’e ema hotu iha direitu atu tau matan ba prosesu dezenvolvimentu ida-ne’e.
“Labele halo impedementu atu servisu ne’e bele konklui tuir tempu tanba iha fatin seluk mós sei presiza Governu atu hadi’a Estrada,” nia dehan.
Iha oportunida ne’e, Ministru Administrasaun Estatál, Tomas do Rosário Cabral, sei orienta ba servisu sira iha munisípiu inklui xefe suku sira atu tau matan ba projetu sira-ne’ebé ita lansa tiha ona.
“Lansamentu ba estrada no bee-moos ne’e la’o tiha la kle’ur imi ba halo impedementu, hanesan munisípiu balun la fó apoiu ba projetu sira-ne’e , tanba ne’e mak projetu atu benefísiu ba povu entaun autoridade lokál sira tenke ba halo fiskalizasaun hodi ajuda programa ne’e bele la’o ho di’ak,” nia hateten.
Prezidente autoridade munisípiu Lautein, Mélio de Jesus, hato’o agardesementu ba Governu da-sia ne’ebé ho kompromisu hodi lori dezenvolvimentu ba Timor laran tomak.
“Aproveita oportunidade ida-ne’e lori komunidade tomak iha Lospalos agradese ba Governu da-sia nia esforsu tomak, maibé ami husu mós atu mellora reabilitasaun estrada ba parte seluk hanesan Iliomar, Loré,” nia dehan.
Enkuantu, projetu reabilitasaun estrada ne’e sei implementa husi kompañia internasionál ChongQing durante tinan ida ho balun ho montante orsamentu $18.836.713,10.
Partisipantes ba atividade ne’e kompostu husi esntidade Governu, autoridade lokál autoridade seguransa no komunidade.
Jornalista : Alexandra da Costa
Editór : Cancio Ximenes
