OEKUSI, 06 Novembru 2025 (TATOLI) – Autoridade Rejiaun Administrativa Espesiál Oekusi Ambeno (RAEOA) liuhusi Diresaun Rejionál Agrikultura sei reabilita kanál irrigasaun natar Ut-Haufo ho fundu rihun $83,216.83 hodi fasilita natar ektare 35 ba benefisiáriu 76 iha bairru Naktuka aldeia Manan suku Bene-Ufe sub-rejiaun Nítibe.
Responsavel Departamentu Irrigasaun, iha Diresaun Rejionál Agrikultura Oekusi, Avelinus Oematan hateten katak, projetu kanál irrigasaun ne’e propoin husi natar na’in-sira, tanba ne’e foin daudaun ne’e Autoridade loke liuhusi prosesu konkursu públiku, ikus mai kompañia lokál Henas Oni Unipesoál.Lda sai manán-na’in.
“Ita monta ona estakasaun. Iha tempu-badak sei kontinua halo lansamentu tanba sei hein selebrasaun kontratu definitivu ida ho Autoridade RAEOA hodi hahú konstrusaun,” nia hateten iha kanál irrigasaun Ut-Haufo.
Nia informa, iha ámbitu monta estakasaun sira-ne’e, hetan akompañamentu mós husi tékniku departementu irrigasaun hamutuk ho tékniku sira husi Diresaun Rejionál Infraestrutura (DRI).
Notísia relevante:Komunidade sira agradese Governu tanba reabilita estrada kilometru haat iha Naktuka
Xefe aldeia Manán, Octaviano Falo, orgullu tanba natar área Ut-Haufo Naktuka presiza duni irrigasaun, nune’e bele fasilita agrikultór sira.
“Iha tinan kotuk, husi autoridade mai rega adubu orgániku AMO iha ne’e, ami rekomenda, tanba ita-nia natar na’in-sira kada tinan atu hatama bee ba natar sira, tenke kee rasik serbisu gotong-royong (serbisu hamutuk ekipa), maibé agora autoridade responde ona, ne’ebé ha’u hanesan autoridade lokál reprezenta natar na’in-sira hato’o agradese ba Governu nia tulun,” nia orgullu.
Notísia relevante:Agrikultura Oekusi rega adubu orgániku AMO ba natar ektare 52
Entretantu, kompañia Henas oni Unipesoál.Lda sei konstrui irrigasaun natár Ut-Haufo Naktuka ho nia medida naruk metru-600 ho verba hamutuk rihun $83,216.83, verba ne’e Autoridade RAEOA aloka husi Orsamentu Jerál Estadu (OJE) 2025 nian.
Jornalista: Abílio Elo Nini
Editór: Rafael Ximenes de A. Belo
