OEKUSI, 18 Dezembru 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA) hamutuk Koordenadór Institutu Apoia Dezenvolvimentu Emprezariál (IADE) Oekusi, selebra kontratu ho emprezáriu selesionada haat ho valór rihun $8 nu’udar benefisiáriu ba programa Fasilidade Inkubasaun Negósiu (FIN) 2025 nian.
Prezidente Autoridade RAEOA, Régio da Cruz Salu, esplika, programa ne’e nu’udar apoia programa fasilidade inkubasaun negósiu ho objetivu atu apoia emprezáriu sira husi negósiu ki’ik no mediu hodi mellora sira-nia investimentu.
Tanba ne’e Autoridadade RAEOA, enkoraja benefísiu haat ne’e, atu ezekuta fundu referidu bazeia ba polítika no programa, ne’ebé sita ona iha planu negósiu idaidak nian.
“Ha’u hakarak osan ne’e implementa bazeia saida mak imi hakerek ona iha idak-idak planu negósiu, atu tulun ita-boot sira-nia investimentu ne’e, tanba atu asesu fundu ne’e liuhusi prosesu, grupu no individu barak mak kompete, ne’ebé ha’u husu ba tékniku sira husi IADE atu kontinua akompaña, susesu ka la’e, labele tinan-tinan ita apoia de’it, maibé atividade la la’o,” nia hateten iha salaun IADE Oekusi, ohin.
Notísia relevante:Empreza 11 iha Oekusi kompete aprezentasaun planu negósiu ba IADE hodi asesu fundu FIN
Koordenadór IADE Oekusi, Ermundu de Jesus Pereira, informa, emprezáriu lokál haat neʼebé asesu fundu FIN ne’e, ekipa tékniku husi IADE sei kontinua halo akompañamentu durante tinan-rua, hodi kontinua tau matan, no enkoraja to’o susesu, no aprezenta ideia negósiu inovativu ne’e iha merkadu.
“Tanba asesu fundu ne’e, atu hamoris emprezáriu lokál sira-nia ideia negósiu, la’ós fó tiha apoia, depois ita husik de’it, maibé presiza tau matan ba sira-nia atividade planu negósiu, ne’ebé husi empreza haat ne’e, kada ema ida sei asesu rihun $2, ne’ebé husi benefisiáriu haat sei simu rihun $8,” nia afirma.
Notísia relevante:IADE fasilita formasaun mikro negósiu ba grupu feto iha Oekusi
Entretantu, emprezáriu selesionadu haat ne’e mak hanesan, Lena de Fátima Marques husi suku Costa sub-rejiaun Pante Makasar ho nia atividade negósiu prodús jus ho ai-fuan lokál, Domingos Quebo husi suku Kutete ho atividade tambak ikan (tanke pisikultura-haki’ak ikan).
Nune’e mós António Sila husi suku Abani sub-rejiaun Pássabe ho nia atividade ortikultura espesiál ba modo repollu no Jerónimu Osvaldo Soni husi suku Bobometo sub-rejiaun Oésilo ho nia atividade negósiu prodús ai-nanas.
Jornalista: Abílio Elo Nini
Editór: Rafael Ximenes de A. Belo
