Estudante na’in-15 husi Oekusi reprovadu iha exame nasionál
OEKUSI, 24 Dezembru 2025 (TATOLI) – Prezidente Komisaun Ezame Nasionál 2025 iha Rejiaun Administrativa Espesiál Oekusi Ambeno (RAEOA), Damiaun da Costa, fó-sai katak rezultadu ezame nasionál tinan ne’e rejista estudante na’in-15 ka konsege pasa ka reprovadu.
Notísia relevante:Estudante Oekusi rihun-tolu resin rejistadu sei partisipa ezame nasionál
Atuál Xefe Departamentu INFORDEPE ne’e, relata, iha Oekusi Ensinu Báziku Sentrál (EBC) iha 23 maibé 21 nia rezultadu 100%, ho totál alunu 1.602, husi númeru ne’e, na’in-12 mak la pasa ka reprovadu, na’in-neen husi Eskola Bázika Sentrál (EBC) Palaban no na’in-neen husi EBC Pássabe.
Kona-ba Ensinu Sekundáriu Jerál (ESG) iha eskola hitu ho totál estudante 1.062, maibé ESG lima mak rezultadu 100%, rua mak laliu persentajén ba reprovadu, husi ESG Palaban na’in-ida no ESG Baqui na’in-rua, ba Eskola Tékniku Vokasionál (ETV) sira iha estudante 448 husi eskola haat ho nia rezultadu 100% .
“Rezultadu finál ba tinan ne’e, iha Oekusi na’in-15 mak reprovadu. Ne’e bazea ba rezultadu husi alunu, nia rasik mak priénxe iha ezame nasionál, tanba sira rasik partisipa direita iha ezame nasionál, la’ós tanba moras ba dezastre ruma, maibé tuir duni ezame nasionál,” nia informa iha salaun edukasaun Oekusi, ohin.
Notísia relevante:Oekusi la rejista estudante finalista atu tuir ezame segunda xamada
Tuir nia, sira-ne’ebé la konsege partisipa iha ezame nasionál, solusaun ne’ebé Ministériu Edukasaun fó sai katak, sei partisipa tan ba ezame segunda xamada. Maibé sira-na’in-15 ne’ebé reprovadu partisipa direita.
“Agora depende ba sira-nia aan, eskola sei la taka dalan ba sira, karik hakarak kontinua iha 2026, eskola nakloke ba ema hotu. Tanba kritéria bazea manuál ezame nasionál atu pasa, tenke hetan valór neen (6) ba leten kada dixipliña, maibé hetan valór lima (5) mai kraik iha dixipliña haat, ne’e reprovadu kedas,” nia afirma.
Iha fatin seluk, Diretór ESG Palaban, Juvinál da Cruz Salu, rekoñese la’ós eskola mak sala maibé estudante mak laiha preparasaun másimu ba ezame nasionál.
“ESG Palaban totál estudante 377 ho persentajen 99,7%. Ami rekoñese na’in-ida mak reprovadu iha siénsia sosiál, ne’ebé todan ne’e la’ós husi profesór ka eskola maibé husi estudante ne’e rasik lakohi atu esforsa ho preparasaun tanba nia valór sira monu iha dixiplina ezame nasionál sira hotu. Ne’ebé, konforme husi estudante hakarak kontinua tan iha tinan oin, eskola nafatin simu,” nia hateten.
Notísia relevante:Edukasaun Oekusi hahú prova finál ba estudante sextu anu ho literásia-numerásia
Jornalista: Abílio Elo Nini
Editór: Rafael Ximenes de A. Belo
