KOVALIMA, 05 Fevereiru 2026 (TATOLI)– Servisu Munisipál Agrikultura Kovalima, liuhusi Departamentu Delegasaun Territoriál Floresta Kafe Planta no Indústria Kovalima, tinan ne’e fó prioridade programa sira hanesan reflorestasaun, ortikultura, viveiru Komunitária, konservasaun bee matan no mós halo patrullamentu asegura animál fuik sira.
“Ami nia programa prisipál atu implementa iha 2026 mak programa reflorestasaun ne’ebé ita hahú kuda ai-oan ho tipu Mahuni, Ai-kakeu, Ai-naa, Ai-saria no saburaka, iha suku Laktos, postu administrativu Fohorem ne’ebé organiza husi organizasaun Internasionál Word-Vision”, Xefe Departamentu Delegasaun Territoriál Floresta Kafe Planta no Indústria Kovalima, Jesusino do Carmo, relata ba TATOLI,I.P iha Kampu Baru-Suai, ohin.
Razaun implementa programa refloresasaun ne’e hodi foku ba kuda ai-oan iha fatin sira ne’ebé mak risku ba dezastre naturál, programa ortikultura haree ba kuda modo no viveiru komunitária ne’ebé estabelese iha postu Suai, Fatumea no Maucatar.
Programa viveiru komunitária iha postu administrativu Suai prepara ai-oan hamutuk rihun 13, ho nia orsamentu mai husi Autoridade Kovalima no husi nasionál, viveiru komunitária iha postu administrativu Fatumea prepara ai-oan hamutuk 6.000 no iha Maucatar prepara ai-oan 12.000.
Fini ai-oan sira ne’e prepara husi guarda floresta sira tanba sira mak kontrola komesa husi prepara to’o ain-ona prontu atu distribui ba komunidade sira bele hodi ba kuda.
Floresta nafatin fó prioridade mós ba konservasaun ba bee moos ne’ebé mak komunidade sira estraga no halo patrullamentu iha postu administrativu hodi kontrola komunidade sira ne’ebé ko’a ai la hetan autorizasaun husi Floresta no asegura animál fuik sira.
Notisia relevante: MAPPF kuda ai-oan 1.606 iha foho-lolon Beduku
Jornalista: Celestina Teles
Editór: Florencio Miranda Ximenes
