OEKUSI, 10 Fevereiru 2026 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, observa diretamente funsionamentu Sentru Saúde Komunitária Oésilo, hodi deteta problema kona-ba fasilidade bázika inklui ekipamentu médiku, presiza hetan apoia.
Notísia relevante:Sentru saúde Oésilo rekomenda MS atu hadi’a eskalaun ba profisionál saúde
Tanba ne’e, ezekutivu ne’e promete katak, sei orienta dirijente serbisu saúde rejionál sira, atu tau prioridade liu ba manutensaun fasilidade bázika no ekipamentu médiku iha Planu Asaun Anuál (PAA) 2027 nian.
“Ha’u mai vizita la’ós ajenda ofisiál, laiha koñesimentu ba dirijente saúde sira, tanba ne’e ita-nia obrigasaun atu mai haree ita-nia fasilidade sira. Ne’ebé, ohin ita haree ona, bele dehan presiza manutensaun bázika ba haris-fatin sira tanba odamatan balun aat no sasán seluktan balun aat ona, ne’e ita-nia obrigasaun tenke hadi’a iha tinan tuirmai, segundu fasilidade ekipamentu médiku balun mós dezde 2012 to’o agora la funsiona, ne’e tenke haree,” nia hateten iha postu saúde Oésilo.
Autoridade másima RAEOA ne’e kompara katak iha fatin barak sira-nia ekipamentu atu atende pasiente sira atualizadu liu (upgrade), maibé Oekusi ne’e sei nafatin laiha mudansa, entaun ne’e labele. “Ha’u hanoin sei ita nu’udar rejiaun autonomi espesiál no zona espesiál tan, maibé ita-nia ekipamentu atu halo prestasaun serbisu institusionál atu fó atendimentu ba povu nia vida, ita sei falta kestaun barak, tanba ne’e serbisu tenke haree ida-ne’e atu ba planu tinan oin, tenke hadi’a buat sira-ne’e,” nia afirma.
Notísia relevante:Autoridade RAEOA nomea Fridos Elo lidera Sentru Saúde Oésilo
Iha biban ne’e, Farmasista Ederlina Eco, esplika katak, kona-ba ai-moruk, iha sentru saúde Oésilo sempre sufisiente, bainhira atende pasiente ne’ebé grave mak foin kontinua dezloka ba Ospitál Referál Oekusi.
“Ohin Prezidente Autoridade haree rasik, fasilidade sira hanesan kadeira, meza, mákina hamoos nehan, armazen ai-moruk no fasilidade seluktan balun la funsiona, maibé kona-ba ai-moruk ita laiha problema, estoke iha armazen iha nafatin, kuandu pasiente ne’ebé moras todan, entaun ami rujukan (enkamiña) ba ospitál referál,” nia hateten.
Iha biban ne’e, pesoál saúde ne’e esplika, kona-ba regulamentu farmasia nian katak bainhira atu fó ai-moruk ba pasiente, presiza reseita ne’ebé refere husi médiku no enfermeiru ka parteira, no sempre halo pedidu rotina ba ai-moruk regulár no emerjénsia.
Nune’e mós halo identifikasaun kona-ba armajenamentu bazea klasifikasaun ai-moruk ne’ebé kaduka, rekolla ai-moruk kaduka no halo destroisaun depois prepara ai-moruk ba aktividade SISCA no mobile Outreach iha komunidade no fó atensaun ba estabilidade ai-moruk inklui prepara relatoriu mensál kada fulan.
Notísia relevante:RAEOA renova kontratu INFPM ho kustu rihun $$600-resin atu fornese ai-moruk
Jornalista: Abílio Elo Nini
Editór: Rafael Ximenes de A. Belo
