KOVALIMA, 11 Fevereiru 2026 (TATOLI)- Ministériu Saúde (MS), liuhusi Vise-Ministru Fortalesimentu Institusionál, José dos Reis Magno, kuarta-ne’e, hamutuk ho Prezidente Autoridade Munisípiu (PAM) Kovalima, deklara katak Munisípiu referidu livre ona husi àrea la so’e fo’er boot arbiru (ALFA).
“Ohin, ita selebra deklarasaun ba Munisípiu Kovalima nu’udar área livre husi So’e Fo’er boot arbiru ka sentina Arbiru (ALFA). Ida-ne’e la’os rezultadu servisu profesionál saúde no voluntáriu sira, maibé fuan husi esforsu konjuntu ema hotu-hotu hahú husi komunidade, autoridade lokál sira, parseiru ne’ebé komprometidu ba sira-nia saúde, ba meiu ambiente ne’ebé mós no dignidade umana,” Vise-Ministru, José Dos Reis Magno, hato’o liuhusi nia diskursu iha salaun AMC-Suai,ohin.
So’e fo’er boot arbiru fó impaktu ba moras sira ne’e iha ligasaun forte ba desnutrisaun ba atrazu dezenvolvimentu fíziku, mentál no inteletuál no kontinua sai nudar kauza ne’ebé kontribui ba mortalidade infantil no iha impaktu negativu ba dezenvolvimentu sósiu ekonómiku família no komunidade sira nian.
“ Ha’u hakarak espresa ha’u nia agredesimentu ba parte hotu-hotu ne’ebé envolve ho komunidade hodi aseita halo mudansa ba prátika uluk ba lidér lokál ho sira nia kompromisu ba profisionál saúde hamutuk ho voluntáriu sira ne’ebé halo akompañamentu kontínua no ba parseiru ho sira-nia apoiu tékniku no finanseiru,” nia dehan.
Ho nune’e, Governante husu atu reforsa mensajen ida fundamentál ba deklarasaun área livre husi sentina arbiru,maibé nu’udar inisiu husi responsabilidade foun ida no sai esensiál atu kontinua garante utilizasaun no manutensaun adekuada.
Governante ne’e husu kontinua prátika regulár kona-bá fase liman ho sabaun no bee-moos hafoin so’e fo’er, molok han ka ka’er hahan atu han kontinua halo promosaun kona-bá ijiene no saneamentu iha família, eskola no komunidade.
Deklasaun ALFA hanesan kompromisu iha Objetivu Dezenvolvimentu Sustentável (ODS ) atu asegura vida ida saudavel no promove bem-estar ba hotu-hotu no ODS 6.2 garante asesu ba saneamentu no ijiene adekuadu.
Ho deklarasaun ALFA Kovalima fó ezemplu ba nasionál ida katak ho atensaun lideransa no kompromisu komunitáriu sei bele alkansa no mudansa ne’ebé metin no di’ak ba saúde públika.
Iha biban hanesan, Prezidente Autoridade Munisípiu Kovalima, Miguel Armanda Cardoso, reforsa ho deklarasaun live husi ALFA nível Munisipál mak nia promete no todan ida ba autoridade Munisípiu hodi hatudu husi autoridade to’o komunidade atu labele so’e foer boot arbiru.
“ Atu labele So’e foer boot arbiru parseiru Dezenvolvimentu sira ajuda ita liuhusi Ministériu Saúde, ohin ita finaliza no hodi deklara ona ALFA nível Munisipál. Ha’u fó xamada ba Administradór postu administrativu sira atu haree programa ALFA tanba ne’e nia benefisiu ba ita hodi halo prevensaun ba moras sira, nia alerta.
Notisia relevante: Fatumea deklara livre husi ALFA
Jornalista: Celestina Teles
Editór: Florencio Miranda Ximenes
