Posibilidade, Konstrusaun sala tolu EBF Bibesi sei konklui iha Novembru 2026

OEKUSI, 03 Agostu 2026 (TATOLI) – Konstrusaun sala tolu ba Eskola Bázika Filiál (EBF) Bibesi, ne’ebé iha suku Usitaqueno, sub-rejiaun Oésilo, tuir planu, posibilidade, sei konklui iha Novembru 2026 ne’e, ho progresu fíziku dadaun ne’e atinje ona 56%.

Projetu ne’e konstrui liuhusi Programa Nasionál Dezenvolvimentu Suku (PNDS) tanba desizaun Konsellu Suku Usitaqueno nian ne’ebé tau prioridade ba infraestrutura edukasaun.

Diretór Servisu Rejionál Edukasaun, Rejiaun Administrativa Espesiál Oekusi Ambeno (RAEOA), Vincêncio Cono, hala’o fiskalizasaun direta ba fatin konstrusaun hodi observa servisu iha terrenu.

Iha atividade fiskalizasaun ne’e, parte edukasaun deskobre husi parte tékniku sira katak konstrusaun fízika atinje ona 56%. No, posibilidade, tempu-badak sei ramata.

“Agradese ba PNDS liliu servisu suku Usitaqueno, liuhusi Konsellu Suku tanba deside tau prioridade ba eskola ne’e hodi aumenta tan tolu sala EBF Bibesi, ohin ita mai observa servisu fíziku kuaze konklui ona espera bele finaliza iha tinan ne’e, nune’e tinan oin estudante sira bele utiliza ba prosesu letiva,” nia hateten iha suku Usitaqueno, ohin.

Notísia relevante:Tinan ne’e, PNDS Oekusi sei ezekuta projetu 22 ho kustu rihun $900-resin  

Nia mós konsidera polítika ne’e tulun tebes setór edukasaun rejionál Oekusi tanba rezolve ona preokupasaun eskola nian.

“Orgullu tebes tanba solusiona problema infraestrutura ba edukasaun, ne’e hanesan servisu integradu entre Ministériu Administrasaun Estatál no Ministériu Edukasaun liliu Diresaun Rejonál Edukasaun Oekusi nian,” nia orgullu.

Impaktu ba aprendizajen no dezafiu profesór

Sentimentu ksolok ne’e, hato’o mós husi Koordenadór EBF Bibesi, Agustinho Nessi, tanba iha prosesu aprendizajen utiliza de’it sala lima no la sufisiente ba estudante 140.

“Ami fó sujestaun ba PNDS no Konsellu Suku, ne’e maka konstrui iha tinan ne’e, aumenta sala tolu, durante ne’e ami uza de’it sala lima, hodi akumula estuante 140 la sufisiénte tanba ami mós implementa programa EMuLi, ne’ebé agora aumenta sala tolu, ba oin sei laiha ona preokupasaun,” nia hateten.

“Agora ami preokupasaun, sei menus iha profesór tanba ami na’in-lima de’it, pelu-menus na’in-neen bele ona, tanba durante ami profesór kobre hotu disiplina sira hotu,” manorin-na’in ne’e akresenta.

Entretantu, tuir dadus ne’ebé Ajénsia TATOLI,I.P asesu iha tékniku PNDS Oekusi, katak progresu konstrusaun EBF Bibesi daudaun ne’e atinje ona 56%, hela de’it reboka, plafon, nahe no monta keramíka, monta Janela no instalasaun eletrisidade.

Notísia relevante:Cristy Gusmão solisita RAEOA habelar Programa EMuLi

Jornalista: Abílio Elo Nini

Editór: Rafael Ximenes de A. Belo