Promove dame maun-alin, Paróku Pássabe prosede misa rekonsiliasaun iha liña fronteira
OEKUSI, 07 Outubru 2026 (TATOLI) – Atu promove lasu amizade nu’udar sarani, Paróku Pássabe, ho inisíativa koordena paroku Oé-Olo iha TimurTengah Utara (TTU) Indonézia, prosede misa rekonsiliasaun iha liña fronteira, ho obejtivu atu hametin relasaun amizade ba komunidade rai rua nian.
Padre Paróku Pássabe, Agostu Hermenegildo Nunes, konfirma perante atividade Mídia Tour ne’ebé organiza husi Uniaun Profisaun Jornalista Timor-Leste (UPJTL), hala’o iha Eskola Tékniku Vokasionál (ETV) São João Paulo II Pássabe hodi sensibiliza importánsia Literásia Mídia sosiál ba estudante sira.
“Igreja nia papél mós halo rekonsiliasaun ba sarani sira iha fatin ne’ebé, liliu ami iha liña fronteira entre Pássabe ho Haumeni-Ana to’o Oé-Olo, ba ida-ne’e ami sempre halo, tanba uluk entre Pássabe ho Sunkaen, Manusasi no Haumeni-Ana, komunidade sempre tuda malu relasaun ho fronteira ka rai senketa, maibé depoizde parte igreja haree presiza buka solusaun oinsá bele hametin unidade iha fronteira,” nia hateten iha eskola ETV Pássabe, tersa ne’e.
Inisiativa ne’e, Parókia Pássabe koordena kedas ho Parókia Oé-Olo Indonézia, ho seguransa fronteira rai rua nian, Forsa Nasionál Indonézia (TNI) ho Polísia Unidade Patrullamentu Fronteira (UPF) inklui servisu migrasaun ho alfandega.
Liuhusi koordenasaun ne’e, iha rezultadu liuhusi atividade ekleziástika ba rekonsiliasaun iha fronteira, tanba merkadu fronteira mós iha, kultura kuaze hanesan, entaun nu’udar umanu no sarani ida tenke hamutuk kria dame iha liña fronteira.
“Tanba ne’e maka ita hasoru malu ho sarani sira husi nasaun viziñu, ne’ebé durante ne’e ami hala’o misa rekonsiliasaun dalarua ona realiza iha fronteira atu sarani husi nasaun rua bele hola parte, depoisde misa, kovivíu hamutuk no fahe informasaun nu’udar sarani ida, fronteira nasaun ita nafatin respeita maibé amizade entre umanu tenki la’o nafatin,” nia hateten.
Notísia relevante:Timor-Leste no Indonézia fó ezemplu rekonsiliasaun ba mundu – Megawati
Nia informa, hafoin realiza misa rekonsiliasaun ne’e, situasaun iha fronteira hatudu mudansa, tinan barak ona, tuda malu, odi malu no hakilár malu iha fronteira laiha ona, faktu hatudu animál sira bele la’o sai ba li’ur no bele tama mai, laiha dezentendimentu ona, tanba idak-idak konsiénte ona katak, nu’udar umanu presiza promove domin no dame hodi kontribui ba prosesu dezenvolvimentu nasaun idak-idak nian.
Xefe Suku Abani, Carlos Elo, konfirma, situasaun iha liña fronteira Pássabe, tanba liuhusi misa rekonsiliasaun mak promove dame, tanba lian ida de’it ho kultura hanesan.
“Suku Abani ne’e suku fronteira, tanba iha parte Haumeni-Ana leten ne’e, fronteira estrada mak fahe, sorin viziñu sira-nian, sorin ita nian, tinan hirak liuba parte igreja hasai inisiátiva di’ak ida hodi hala’o misa iha fronteira iha tempu paskua no natal, ne’ebé agora laiha problema hanesan uluk ita rona bebeik Pássabe problema bebeik tanba tuda malu, maibé agora situasaun hakmatek haree malu liha ona odiu hanesan uluk,” nia hateten.
Jornalista: Abílio Elo Nini
Editór: Rafael Ximenes de A. Belo
