iklan

NASIONÁL

“Matebian Paulo Pereira dedika nia moris tomak servi uma kreda-TL

“Matebian Paulo Pereira dedika nia moris tomak servi uma kreda-TL

Maestro Paulo Pereira dos Santos. Imajen: Tomé Amado

DILI, 26 novembru 2022 (TATOLI)—Pe. Angelo Salsinha konsidera matebian Paulo Pereira dos Santos dedika nia moris tomak hodi servi uma kreda no nasaun Timor-Leste.

Notísia Relevante: Paulo: “Múzika ‘Hanoin Ha’u-Nia Belun' Hakerek Ba Ha’u-Nia Alin”

“Señor Paulo Pereira, ita-nia mestre ne’e iha nia vida tomak ba uma kreda no ba ita-nia nasaun doben Timor-Leste, ema ne’e marka istória makas tebes. Ita haree istória ne’ebé konkretu hosi parte uma kreda, ema ne’e boot no moris ho uma kreda de’it, hahú kedas nia sei kiik no nia vida juventude to’o nia dedika nia an tomak ba uma kreda,” Amo Angelo Salsinha hateten ba Agência Tatoli iha matebian nia rezisdénsia Lahane Osidentál, Dili, sábadu ne’e.

Rezultadu konkretu hosi matebian Paulo Pereira dos Santos dedika an hodi servi uma kreda mak nia halo múzika lubuk ida ba igreja, hanesan múzika espirituál ba litúrjia ninian no rezultadu konkretu seluk mak grupu Korál Santa Cecilia ne’ebé famozu tebe-tebes iha Timor-Leste ho ezisténsia kle’ur ona.

Matebian ne’e ema ne’ebé fidelidade, familia simples, ema ne’ebé dedika nia an tomak no ema fiar na’in no ida-ne’e ezemplu no modelu ba joven no ba familia sira seluk, tanba matebian ne’e mós nunka reklama iha nia vida no nia an tomak, no buat hotu ne’ebé iha nia fó ho ksolok.

“Ba nasaun, ita haree katak, nia ema mate-restu ida 12 novembru no nia kontribuisaun boot tebe-tebes ba nasaun mak ita haree Hino sira ne’ebé nia hamutuk ho ita-nia patriota sira nia halo mós armonizasaun kona-ba múzika patria-patria, hamutuk ho Abilio Araújo no sira seluk, ida-ne’e obra boot ida,” nia dehan.

Aliende ne’e, nua hakerek múzika ba “Um minutu de silénsiu” ne’ebe kada komemora loron nasionál hanesan 20 maiu no 28 novembru sempre kanta niia obra ne’e hodi ema hotu halo “minute ida hakmatek”.

“Ida-ne’e, ita haree boot teb-tebes no hino sira seluk hanesan juventude luta Falintil nian arranjementu furak no múzika kulturál sira seluk nia rasik mak halo arranjementu no nia rasik mak kompozitór ba múzika sira-ne’e. Ida ne’e dedikasaun ida marávillozu hosi ita-nia juventude, familia no jerasaun foun ne’ebé dedikasaun ba uma kreda no nasaun. Ita sura nia obra sira labele, tanba obra nia halo ne’e lahotu no memória ninian sei nafatin no jerasaun ba jerasaun sei kontinua nafatin ho knananuk hino. Ha’u hanoin ida-ne’e onra boot ida ba ita-nia Maun Paulo Pereira no mestre ida-ne’ebé ita hanoin hamutuk,” nia hateten.

Matebian nia oan mane boot, Egidinho dos Santos, hateten serimónia ba loron ohin hanesan serimónia loron 40 ba nia aman Paulo Pereira dos Santos nian.

“Ida-ne’e ai-funan dahuluk, nia hahú atu halo ba loron 40, maibé tanba ho kondisaun bainhira ita dada to’o loron 40 ne’e tama fali ba loron boot ona (Adventu), tanba ema balun sei prepara ba natál tanba ne’e habadak ba loron ohin,” nia dehan.

Notísia Relevante: Egidinho dos Santos: “Husik ami-nian papa halot besik ami”

Jornalista : Nelia Fernandes

Editór      : Cancio Ximenes

iklan
iklan

Leave a Reply

iklan
error: Content is protected !!