iklan

NASIONÁL, POLÍTIKA

FOKUPERS husu PN aprova lalais projetu-lei protesaun ba labarik

FOKUPERS husu PN aprova lalais projetu-lei protesaun ba labarik

Atividade labarik sira faan manu-tolun daan iha estrada ninin. Imajen TATOLI/Antonio Daciparu..

DILI, 30 janeiru 2023 (TATOLI)—Diretora Forum Komunikasaun Feto Timor Lorosa’e (FOKUPERS), Maria Fátima Pereira, husu reprzentante povu iha Parlamentu Nasionál (PN) atu aslera hodi debate no aprova lalais projetu-lei protesaun ba labarik no joven iha perigu.

Notísia Relevante: PN diskute projetu-lei protesaun ba labarik iha espesialidade

“Ita hein katak ho projetu-lei protesaun ba labarik no joven iha perigu ne’ebé sei iha meza Parlamentu Nasionál bele halo debate no aprova lalais, nune’e bele implementa no asegura ita-nia labarik sira iha dalan ninin iha Timor-Leste,” nia hateten ba Agência Tatoli nakait ho selebrasaun Loron Munndiál Labarik iha Dalan Ninin ne’ebé mundu selebra kada 31 janieu iha kada tinan, iha nia kna’ar fatin Palapasu, segunda ne’e.

Tanba, nia dehan, haree ba realidade moris iha kapitál Dili no iha Timor-Leste laran tomak, labarik barak mak kontinua hala’o sira-nia moris iha dalan ninin hodi hala’o atividade negósiu hanesan faan modo no faan manu-tolun hodi sustenta família.

“Ha’u hanoin tan de’it futuru labarik nian ita-nia membru Parlamentu Nasionál bele aselera no tau importánsia no molok mandatu ramata iha ona solusaun ka desizaun hodi bele gia instituisaun relevante sira hodi implementa no asegura labarik sira-nia direitu,” nia esplika.

Tanba, tuir nia, membru Parlamentu Nasionál (PN) sira mak sai povu Timor-Leste nia tilun no matan liu-liu ba labarik futuru nasaun ne’e nian ne’ebé moris iha dalan ninin,

Projetu-lei protesaun ba labarik mak pendente dezde tinan 2017, lei justisa juvenil mak pendente hahú tinan 2010, kódigu ba labarik pendente hahú tinan 2012, kódigu internasional ba merkadu susu-been substitutu mak pendente hahú tinan 2010 inklui Politika Ben Estar ba Labarik no Familia mak pendente hahú tinan 2015.

Iha Loron Mundiál Labarik Dalan Ninin ne’e, nia husu ba entidade sira hotu mai hamutuk hodi halo kompromisu atu servisu hamutuk hodi aprova lei protesaun ba labarik no politika esensiál sira ho rápidu no posivél.

Notísia Relevante: INDDICA husu PN fó prioridade aprova projetu-lei protesaun ba labarik

Jornalista : Osoria Marques

Editór       : Cancio Ximenes

iklan
iklan

Leave a Reply

iklan
error: Content is protected !!