DILI, 02 fevereiru 2023 (TATOLI)–Ministru Administrasaun Estatál (MAE), Miguel Pereira de Carvalho, hateten proposta lei finansa munisipál mak sei regula no jere Orsamentu Jerál Estadu (OJE) nian iha munisípiu sira hotu.
Notísia Relevante: 24 janeiru: Komisaun C halo audiénsia públika proposta-lei Finansa Munisipál
“Ita halo ida-ne’e tanba oinsá mak bele define hodi munisípiu halo prosesu orsamentasaun no halo planeamentu no relatóriu ida. Segundu mak define kona-ba prinsípiu orientasaun planu orsamentu poder lokál. Terseiru proposta-lei ne’e mós regulamenta ida oinsá regula munisípiu jere sira-nia reseita ne’ebé maihosi reseita propria ne’ebé hosi Orsamentu Jerál Estadu,” Governante ne’e hateten ba Agência Tatoli hafoin inaugural Uma Naroman ba Povu (UNP) iha Covalima, kinta ne’e.
Proposta-lei ne’e mós sei elabora kona-ba oinsá munisípiu sira bele empresta sujeitu ba aprovasaun hosi Govenru sentrál no define mós kona-ba orsamentu saida mak sei fó ba munisípiu ba poder lokal bainhira aprova OJE ne’e.
Notísia Relevante: MAE sensibiliza lei podér lokál no desentralizasaun administrativa ba autoridade Bobonaro
Bainhira proposta-lei munisipál ne’e aprova no promulga, entaun kompleta ona kuadru legál sira hotu-hotu ba estabelesimentu poder lokál, no ho aprovasaun ne’e sei kompleta tan ba lei tolu seluk ne’ebé mak mandatu VIII Governu Konstitusionál aprova hanesan lei divizaun administrativa territoriál, lei poder lokál no desentralizasaun administrativa no mós lei eleisaun munisipál.
“Agora atu hakat ba eleisaun konforme grande proposta do ministériu nian, eleisaun halo fazeadamente iha tinan 2024, 2025 no 2026. Maibé ida-ne’e kabe ba Governu foun sei mai ne’e nian mak deside,” nia dehan.
Tanba ne’e mak Governu ho Komisaun C Parlamentu Nasionál halo audiénsia hodi halo diskusaun kona-ba proposta refere.
“Ha’u reúne ho komisaun C Parlamentu Nasionál kona-ba lei finansa lokál, audiénsia ne’e komisaun C halo ne’e pozitivu tebes tanba deputadu sira bele hatene di’ak liután konteudu hosi lei refere,” nia esplika.
Komisaun C agora iha hela faze konkluzaun ba relatóriu paresé ne’ebé sei aprezenta iha Parlamentu Nasionál hodi halo diskusaun nune’e baixa iha ba PN atu hali debate espesialidade
Notísia Relevante: Komisaun C sei halo audiénsia públika proposta-lei Finansa Munisipál
Jornlista : Osória Marques
Editór : Cancio Ximenes
