Jerasaun patriota submete proposta 48 ba Konsellu Veteranu Manatuto

DILI, 20 abríl 2023 (TATOLI)–Prezidente Konsellu Veteranu Munisípiu Manatuto, Boaventura Soares ‘Tocha’, hateten tinan ne’e jerasaun patriota no veteranu nia oan sira hatama proposta hamutuk 48 husu apoiu fundu atu halo atividade ekonomia.
Notísia Relevante: SASCAS-CCLN selebra akordu apoiu grupu veteranu 0-3 no 4-7
“Agora ita-nia jerasaun patriota no mós veteranu ne’ebé ho grau 0-3 no 4-7 nia hodi buka moris liuhosi atividade ekonomia. Buat ne’ebé iha proposta mak liga agrikultura hanesan haki’ak karau, bibi, no iha mós agrikula, halo fila liman, no seluk tan. Ida-ne’e mak sira husu ba Konsellu nasionál hamutuk ho SASCAS tanba SASCAS ho CCLN selebra ona akordu atu apoiu grupu veteran 0-3 no 4-7,” Boaventura Soares ‘Tocha’ hateten ba Agência Tatoli liuhosi telefónika, kinta ne’e.
Prezidente veteranu subemte ona proposta sira-ne’e ba Konsellu Kombatente Libertasaun Nasionál (CCLN) maibé CCLN haruka fila tanba montante ne’ebé husu boot liu.
“Ita sei haree fila-fali tanba iha proposta balun ne’ebé osan boot liu, nune’e CCLN haruka fila mai ita. Ida-ne’e la signifika atu la ajuda lae, maibé hein de’it bainhira CCLN ho SASCAS orienta,” nia hateten.
Tanba, tuir nia, Servisu Apoiu Sosiedade Sivil no Auditoria Sosiál (SASCAS, sigla portugés) apoiu ne’e rihun $50 de’it no proposta ne’ebé simu ne’e, nia pedidu ba montante orsamentu boot liu.
Antes ne’e, SASCAS no CCLN fó apoiu ba grupu veteranu grau 0-3 no 4-7, iha territóriu nasionál ho orsamentu provolta rihun $ 500, ho objetivu atu apoiu ba membru sira hodi hadi’a moris.
Notísia Relevante: KVMC sei hasai sirkulár veteranu prenxe formuláriu forma grupu hakiak animál
Jornalista : Osória Marques
Editór : Cancio Ximenes

