Maria Teresinha Viegas eleita Primeira Vise-Alexandrino Afonso Segundu Vise Prezidente PN

DILI, 26 juñu 2023 (TATOLI)–Deputadu sira iha lejislatua daneen, segunda ne’e, liuhosi reuniaun plenária hili Deputada Maria Teresinha Viegas eleita ba Primeira Vise no Alexandrino Afonso Nunes sai Segundu Vise Prezidente Parlamentu Nasionál (PN).
Notísia Relevante: Maria Fernanda Lay feto dahuluk lidera lejislatura daneen
Tuir karta ne’ebé hato’o iha loron 23 juñu asuntu ba Prezidente Parlamentu Nasionál nomeasaun kompozisaun meza hosi bankada maiória parlamentár CNRT-PD kompostu hosi Primeira Vise Prezidente Parlamentu Nasionál, Maria Teresinha Viegas hosi bankadaCNRT, Segundu Vise Prezidente Parlamentu Nasionál, Alexandrino Afonso Nuneshosi bankada PD.
Sekretária meza PN, Virginia Ana Belo (CNRT) no primeira Sekretária Meza PN, Maria Teresa da Silva Gusmão (PD) no Segundu Sekretária Meza PN, Bendita Monis Magno (CNRT).
Liuhosi eleisaun sekretu kandidatu nomeasaun ba kompozisaun meza ne’e eleitu ho rezultadu votasaun a-favór 43 kontra 0, abstensaun 20, nulu ida (1), Deputadu 64 ezerse votu no ida la vota.
“Hodi nune’e imediatamente, ha’u konvida Deputadu eleitu ba Vise Prezidente, Maria Teresinha Viegas no Segundu Vise Prezidente Parlamentu Nasionál, Alexandrino Afonso Nunes, no Sekretária Meza, Virginia Ana Belo, tuir mai primeira Sekretária Meza PN, Maria Teresa da Silva Gusmão no Segundu Sekretária Meza, Bendita Monis Magno. Ha’u-nia parabéns ba Deputadu eleitu sira hodi kompeleta meza, serbisu todan maibé ita hotu hamutuk serbisu hanesan órgaun kolejiál,” Prezidente Parlamentu Nasionál, Maria Fernanda Lay, fó sai iha sala plenária PN.
Nia hateten, kandidatu sira ne’e kumpre rekezitu ne’ebé iha aprezenta prazu iha oras 24 nia laran, tanba meza simu iha loron 23 juñu tuir mai iha loron sábadu no domingu labele hala’o eleisaun no ohin mak hala’o realmente kompleta.
Tuir rejimentu Parlamentu Nasionál iha artigu 18 (Meza), Meza Parlamentu kompostu hosi Prezidente Parlamentu, Vise Prezidente na’in-rua, Sekretáriu ida no Vise-Sekretáriu na’in-rua.
Iha artigu 19 (Eleisaun ba Vise-Prezidente, Sekretáriu no Vise-Sekretárih), iha alínea 1 hateten, Vise-Prezidente sira, Sekretáriu, no Vise-Sekretáriu sira-ne’e eleitu ba lejislatura ida.
Iha alínea 2 haktuir, kandidatura kargu Vise-Prezidente, Sekretáriu no Vise-Sekretáriu PN tenke subskreve hosi mínimu deputadu na’in-ualu (8) no máximu na’in-12, no aprezenta liuhosi lista fesada, kompleta no nominativa.
Alinea 3 hateten, kandidatura ba kargu previstu iha númeru anterór tenke aprezenta ba Prezidente Parlamentu to’o oras 24 molok data ne’ebé marka ba eleisaun.
Iha alínea 4 dehan, eleisaun sei hala’o tuir eskrutíniu sekretu, no sei buka atu asegura katak kompozisaun lista konkorente ida-idak, komforme posível, iha partisipasaun proporisonal husi banakda parlamentár ne’ebé iha reprezentasaun Parlamentu.
Antes ne’e, iha reuniaun plenária dahuluk lejislatura daneen iha loron 22 juñu liu ba liuhosi eleisaun Deputadu/a sira hili kandidatu lista úniku hosi koligasaun CNRT-PD, Maria Fernanda Lay, hodi eleita ba Prezidente Parlamentu Nasionál ba periódu 2023-2028 ho rezultadu votasaun a-favór 45, kontra 0, abstensaun 19 no votu branku ida (1).
Notísia Relevante: PN sei realiza eleisaun ba Vise Prezidente PN iha semana oin
Jornalista : Nelson de Sousa
Editór : Cancio Ximenes

