OÉ-CUSSE, 19 outubru 2023 (TATOLI – Sekretáriu Estadu Formasaun Profisionál no Empregu (SEFOPE) hamutuk ho parsériu, Organizasaun Internasionál Traballu (ILO, sigla inglés), kinta ne’e, hala’o konsultasaun ba esbosu lei kontra violénsia doméstika no asédiu seksuál iha mundu traballu ba empregadór no traballadór inklui instituisaun Estadu sira iha Rejiaun Administrativa Espesiál Oé-Cusse Ambeno (RAEOA).
Notisia relevante:PNTL rejista kazu violénsia doméstika aas iha Oé-Cusse
Diretór jerál SEFOPE hateten, Carlito do Rosário Cabral, hateten, esbosu lei ne’e iha kapítulu hamutuk neen ho artigu 33.
Nia informa, inisiátiva hamosu esbosu ne’e, mai hosi Konsellu Nasionál Traballu SEFOPE hodi hamutuk ho parseiru internasionál ILO kolabora hodi hala’o konsultasaun ba entidade sira iha munisipíu atu rona opiniaun sira.
“Konsultasaun atu sira iha koñesimentu ba aban bainrua lei ne’e vigór, sira-bele aplika iha sira-nia serbisu-fatin, ho objetivu prinsipál, katak ita atu dignifika ema hotu, mezmu traballadór no empregadór moós tenki respeitu,” Diretór jerál SEFOPE, Carlito do Rosário Cabral tenik.
Tuir nia, kona-bá rejistu kazu la’ós iha SEFOPE de’it, maibé instituisaun sira seluk, hanesan Polísia Nasionál Timor-Leste (PNTL), Organizasaun Naun-Governamentál (ONG) sira, maibé tanba lei seidauk forte maka seidauk regula sira ho dignu no seguru.
“Konsultasaun ne’e importante katak, depois lei ida-ne’e vigór ita sei halo revizaun ba ita-nia lei balun, kona-bá estatutu Inspesaun jerál traballu nian tenki halo revizaun, lei violénsia doméstika inklui lei traballu bazeia ba esbosu ne’ebé agora ita halo konsultasaun,” nia afirma.
Ezekutivu ne’e haktuir, konsultasaun ne’e realiza ona iha munisipíu sira seluk, bainhira remata SEFOPE sei kompleta esbosu ne’e hodi aprezenta ba Ministériu Koordenadór Asuntu Ekonómiku hodi lori ba Konsellu Ministru atu hetan aprovasaun.
Iha biban ne’e, Pontu fokál KSTL Oé-Cusse, Hendrike Sila, hanesan partisipante, informa, lei ne’e sensitive, importante atu konsulta ba empregadór no traballadór sira, tanba dalaruma akontese violasaun iha serbisu-fatin.
“Treinamentu ne’e importante atu regula di’akliu-tán ita-nia traballadór sira, tanba ita haree Oé-Cusse iha jinjan barak, projetu ZEESM barak mak kaer hosi kompañia estranjeiru entaun persiza lei ida forte atu regula ita-nia traballdór no kompañia sira, atu iha futuru bele hadi’a liu-liu feto sira,” nia hateten.
Notísia relevante:KSTL iha kompromisu kontinua proteje direitu traballadór
Jornalista: Abílio Elo Nini
Editór: Rafael Ximenes de A. Belo
