iklan

BOBONARO, INKLUZAUN SOSIÁL, MUNISÍPIU

SEPS orienta APC aselera apoia rekuperasaun ba vítima iha Lourba

SEPS orienta APC aselera apoia rekuperasaun ba vítima iha Lourba

Vítima konfrontu iha suku Lourba, postu administrativu Bobonaro, munisípiu Bobonaro simu apoia sasán hosi Primeiru-Ministru, Kayr Rala Xanana Gusmão, sábadu (04/11/2023). Imajen Tatoli/Sérgio da Cruz

BOBONARO, 04 novembru 2023 (TATOLI)Sekretáriu Estádu Protesaun Sivíl (SEPS), Domingos Mariano Reis, sábadu ne’e, orienta Komandante Autoridade Protesaun Sivíl (APC, sigla portugés) atu aselera prosesu apoia rekupasaun ba vítima konfrontu iha suku Lourba, postu administrativu Bobonaro, munisípiun Bobonaro.

“Señor Komandante rejista hela ba, orienta diretór nasionál hodi prepara aban dadeer materiál sira ne’e mobiliza ona mai Bobonaro, tanba komunidade ne’ebé uma hetan sunu, sira ne’e agora laiha buat ida,” governante ne’e hateten, durante hamutuk ho ekipa Autoridade Protesaun Sivíl Bobonaro halo levantamentu dadus iha terrenu ba uma ne’ebé hetan sunu no estragu relasiona konfrotu iha sesta (03/11).

Ekipa Autoridade Protesaun Sivíl Bobonaro identifika uma ne’ebé hetan estragu grave hamutuk sia no entragu kama’an 10 resin.

Notísia Relevante : PM Xanana halo diálogu ho komunidade Lourba no Karabau

Iha sorin seluk, vítima, Cornélio Alves, sente triste ho akontesimentu ne’e tanba daudaun ne’e hela de’it roupa iha isin lolon.

Sidadaun suku Lourba ne’ebé nudar manorin iha Eskola Ensinu Bazíka Filiál ida iha suku Karbau ne’e konta tuir, akontesimentu ne’e bainhira sira ba partisipa eleisaun órgaun suku no selebrasaun loron finadu iha suku orijen.

“Horiseik ha’u mai ne’e uma mutuk tia, sasán sira ida de’it mós la konsege salva, ha’u-nia dukumentu profesór sira, inklui alunu sira-nia osan $70 mós iha uma-laran ahi han hotu,” nia konta tuir.

Manorin ne’e husu ba parte kompetente, liu-liu Ministériu Edukasaun atu haree ba kestaun ne’e.

“Hau preukupa liu mak hau-nia diploma ne’e, tanba ha’u nu’udar profesór, ida-ne’e mak baibain ema-boot sira kuandu presiza diploma ne’e ha’u atu foti tan iha ne’ebé,” nia tenik.

Antes ne’e, Primeiru-Ministru, Kay Rala Xanana Gusmão, hamutuk ho komitiva halo vizita ba suku Lourba no Karabau, hodi halo diálogu ho komunidade kona-ba konfrontu no iha biban hanesan fó apoia sasán bazika sira hanesan bikan, sanan, taxu, sumasu, kadeira, roupa no seluk tan ba vítima sira. Nune’e mós, Autoridade Potesaun Sivíl Bobonaro fó apoia umanitaria ba vítima.

Jornalista     : Sérgio da Cruz

Editora          : Julia Chatarina

iklan
iklan

Leave a Reply

iklan
error: Content is protected !!