OÉ-CUSSE, 10 janeiru 2024 (TATOLI) – Dom Virgílio Cardeal do Carmo da Silva SDB, apela ba estudante sira, atu kuda metin valór morál nu’udar sarani Katólika hodi hatudu komportamentu di’ak nu’udar jerasaun ba futuru.
Notísia relevante: Dom Virgílio Cardeal inaugura Eskola Sekundáriu Katólika Padiae Oé-Cusse
Tuir Dom Virgílio Cardeal do Carmo da Sílva, katak, Estadu Timor-Leste, prepara no kria kondisaun iha setór edukasaun, atu fasilita oan sira asesu edukasaun no dignu, maibé tenke estuda komporta, hatudu ita-nia an nafatin, nu’udar estudante ne’ebé di’ak.
“Estudante ne’ebé di’ak, primeiru tenke disiplina, liuliu sira-ne’ebé sekundáriu, imi mak tenkensai seniór iha eskola, sai maun bo’ñot no bin boot, hatudu ezemplu di’ak,” Dom Virgílio Cardeal do Carmo da Sílva, hato’o nia apelu ne’e iha ámbitu inaugurasaun eskola sekundária Katolika Padiae, Oé-Cusse, kuarta ne’e.
Bainhira atividade aprendizajen hahú 08:00, tenke pontualidade, tenke disiplina, nu’udar estudante haka’as-an, tenke hatene kuida eskola moos, kumpri regra eskola nian.
“Eskola ne’e ejize buat rua de’it, inan-aman, profesór no estudante sira tenke tau iha ulun, primeiru katak, eskola liga ho valór, katak iha eskola labarik sira, valór mak pontualidade disiplina, respeita no morál.
Segundu maka koñesimentu, katak siénsia sira-ne’e tama, entaun iha eskola ida, buat rua ne’e prinsipál, la’ós iha eskola hanorin labarik atu sai matenek iha matemátika de’it, la’ós aprende de’it inglés ho portugés.
Maibé tenke forma imi-nia an iha buat rua ne’e, valór no koñesimentu, ka karáter ho koñesimentu, la’ós hatene de’it maibé hahalok komportamentu, ida-ne’e maka fó hanoin mai ita, presiza kuda iha eskola sira,” nia katak.
Nia hatutan, valór no koñesimentu la’ós vale de’it ba iha eskola Katolika sira maka presiza, maibé eskola hotu-hotu iha Timor, tanba Timor-Leste maioria relijiaun Katólika, uluk kedas ita-nia bei-ala sira hanorin ita atu hatene haburas valór morál no valór di’ak sira-ne’e.
“Entaun iha eskola ita tenke kuda nafatin buat rua-ne’e, mestre sira liu-liu diretór eskola sira, hein katak iha tinan 2024 ne’e eskola oan sira hatudu karáter di’ak atu prepara ita-nia an ba futuru,” nia fó hanoin.
Notísia relevante: Dom Virgílio husu graduandu kumpre promesa sai manorin di’ak iha relijiaun no morál
Jornalista: Abílio Elo Nini
Editórr: Evaristo Soares Martins
