DILI, 11 abríl 2024 (TATOLI)—Diretora Nasionál Rekursu Humanu iha Ministériu Edukasaun (ME), Anita Tavares de Jesus, hateten númeru kandidatu profesór ne´ebé pasa provizoriu liuhosi teste eskrita ba vaga bolsa rekrutamentu (kandidata) ne’e foin mak hamutuk 486.
Notísia Relevante: Aplikante bolsa rekrutamentu ba profesór 13.021 admitidu atu tuir teste eskrita
“Ita foin rejistu ema 486, no iha prosesu ne’e ami bolu referénsia iha Bolsa Kandidata (BK) sia,” Diretora ne´e hateten ba Agência Tatoli, iha nia kna´ar fatin, kinta ne’e.
Hosi dadus provizóriu ne’e, nia dehan, kandidatu profedsór ba ba eskola pre-eskolár iha ema na’in-34 mak pasa, ensinu báziku primeiru no segundu siklu hamtuk 170, ensinu báziku terseiru siklu ba iha lian tétun iha na’in-62, portugés 106, inglés 48, matemátika 45 no siénsia naturál provizóriu hamutuk 21.
Bolsa Kandidata hirak-ne’ebé ramata ona teste mak mak pre-eskolár, ensinu báziku primeriu no segundu siklu, terseiru siklu iha matéria lian tétun, postugés, inglés ho matemátika no siénsia naturál mak daudaun ne’e iha hela prosesu nia laran.
Tuir despaixu ministeriál ne’ebé fó sai katak prosesu ne’e bazeia ba dekretu-lei rekrutamentu nian katak rezultadu teste ne’e valór tenke atinje 60 no sira-ne´ebé nia valor menus hosi 60 ba kraik ne´e sei la pasa.
Bolsa Kandidata profesór ne’e kolabora entre ME ho Organizasaun naun Govermentál BELUN rejistu ona kandidatura hamutuk 13.021, no ME presiza ema na’in-2.400 mak sai manorin hodi koloka ba kada eskola sira.
“Ita presiza manorin 2.400 maibé foin mak 486, ne’e hatudu barak mak liu no valór menus hosi 50 mak barak. Ida-ne’e posibilidade hakat ba loke rejistu foun ba bolsa kandidata ne’e tanba valór la prienxe kritéiru. Maibé, hanesan tékniku dehan valór la pasa mak barak, politikamente superiór mak sei deside no tenke regula tuir diploma ruma, presiza tempu mós,” nia dehan.
Notísia Relevante: ME posibilidade loke tan vaga bolsa kandidatu profesór tanba valór menus
Jornalista : Osória Marques
Editór : Cancio Ximenes
