DILI, 08 jullu 2024 (TATOLI)– Pároku igreja Imaculada Conceição Katedrál Dili, Paulos Maia, hateten Bhakti Timor Karya (BTK) Unipesoál, Lda, daudaun ne’e halo hela verifikasaun finál ba obra reabilitasaun igreja Katedrál, Vila Verde, Dili.
Notísia Relevante: Empreza BTK reabilita katedrál Dili atinje ona 80%
“Hanesan ita hotu hatene no haree sira agora iha ona faze finalizasaun. Ha’u labele dehan 100%, maibé oras ne’e iha faze finál ba reabilitasaun,” Pároku ne’e hateten ba Agência Tatoli, iha Lecidere, kinta (04 jullu 2024) ne’e.
Nia esplika, empreza BTK halo hela revizaun ba obra, tanba atu haree keta iha fallansu ruma ba iha reabilitasaun ne’e karik kompañia bele hadi’a hikas.
Agora ne’e, empreza finaliza hela ba preparasaun ba vizita amu Papa Francisco hotu lai no sei iha avaliasaun ida entre Governu ho igreja hodi halo buat ruma.
Tuir planu, Papa Francisco sei hala’o vizita pastorál iha Timor-Leste durante loron tolu nia laran, hahú husi 09-11 setembru 2-24 ne’e, papa sei hasoru malu ho bispu, padre no madre sira iha igreja Imaculada Conceição Katedrál.
Papa Francisco vizita nasaun 4 iha Asia no Oseania
Tuir portál ofisial Vatican News haktuir, Papa Francisco sei hala’ o nia vizita pastorál iha Indonézia, Papua Novaguine, Timor-Leste no Singapura iha 2-13 September 2024.
Papa Francisco simu konvite hosi Xefe Estadu no autoridade Igreja atu hala’o vizita pastorál ba da-43 ba estranjeiru. Tuir oráriu, Papa Francisvo sei vou hosi Roma iha 02 setembru no sei fila-fali ba Roma iha 13 setembru 2024.
Santu Padre sei hala’ o nia viajen dahuluk ba Jakarta-Indonézia, iha 03 setembru 2024 no iha Jakarta to’ o 06 setembru 2024. Populasaun Indonézia maiória Musulmanu ne´ebé boot iha mundu no Katólika kuaze populasaun juta ualu (8) ka ekivalente 3,1%
Hafoin ne´e, Papa Francisco sei hala’o vizita pastorál ba Port Moresby, Papua Novaguine no Vanimo iha 06-09 setembru 2024. Populasaun iha Papua Novaguine 32% sarani Katólika ka kuaze ema hamutuk juta rua.
Husi ne´eba, Papa Francisco sei vizita Dili-Timor-Leste durante loron tolu ne´ebe sei hahú hosi iha 09-11 setembru 2024. Timor-Leste maioria relijiaun Katólika ho populasaun 96% ka ema hamutuk juta ida.
Hafoin ne´e, Papa Francisco sei vizita Singapura durante loron tolu hahú hosi 11-13 september 2024. Maizumenus iha sarani Katólika hamutuk 395.000 ne´ebé hela iha Singapura ne´e reprezenta kuaze populasaun 3%.
Entretantu, Papa Francisco halo vizita pastorál mai Timor-Leste ne´e sei akompaña husi bispu no kardeál hamutuk 55 no jornalista internasionál hamutuk ema na’in-85.
Notísia Relevante: Papa Francisco sei prezide misa solene iha Tasi-Tolu iha 10 setembru
Jornalista : Jesuína Xavier
Editór : Cancio Ximenes
