DILI, 12 setembru 2024 (TATOLI)-Sua Santidade Amu Papa Francisco, fó konsellu ba foinsa’e timoroan sira atu kontinua halo barullu bara-barak, respeita no rona ema ferik-katuas ka idozu sira.
Notísia Relevante: Papa Francisco husu joven sira tenke aprende valór fraternidade
“Ha’u fó konsellu ba imi, dahuluk kontinua halo barullu bara-barak, daruak respeita no rona ema ferik-katuas sira,” Papa Francisco hato’o iha diskursu bainhira hala’o enkontru ho reprezentante joven timoroan sira iha Sentru Konvensaun Dili (CCD, siglá portugés), kuarta ne’e.
Buat ida ne’ebé foinsa’e sira halo iha rai seluk mós joven sira gosta hakilar halo barullu.
Nia konsidera, iha Timor-Leste nakonu ho juventude ne’ebé hatene fahe hamnasa-midar ba ema seluk.
“Iha buat rua ne’ebé toka loos ha’u-nia fuan, bainhira ha’u la’o iha dalan sira Dili laran ne’e, juventude ho hamnasa, imi povu ida-ne’ebé hatene hamnasa no kontinua hanesan ne’e,” Papa Francisco hateten.
To’o bainhira de’it, Papa Francisco hateten, sei lahaluha timoroan sira-nia hamnasa-midar tanba povu Timor-Leste ne’e povu id ahaksolok nakonu ho esperansa.
Notísia Relevante: Amu Papa sei la haluha joven timoroan nia hamnasa
“Ha’u sei nunka haluha imi-nia hamnasa-midar, imi labele para atu hamnasa. Imi mak maioria iha povu Timor ne’e nakonu ho ksolok no esperansa. Imi labele lakon entuziasmu fi’ar nian,” Santu Padre dehan.
Ho ida-ne’e, nia hateten, atu kuidadu ho visu sira, tanba ema barak mai imi, vendedór felisidade fa’an droga ne’ebé fó ba imi hanesan felisidade ne’ebé dura karik meia ora de’it.
Nune’e, Santu Padre dezeja la’o ba oin ho alégria foinsa’e sira-niam no tenke hatene mehi moris ni’an, ho ida-ne’e joven sira tenke hatene halo barullu atu hatudu katak moris mak ne’e mak ne’e.
Papa Francisco relembra fali katak, nasaun ne’e markadu tebes ho nia istória, fé no rekonsiliasaun.
“Foinsa’e erdeiru liman rohan husi sira-ne’ebé harii ona nasaun ida-ne’e, tanba ne’e labele lakon memoria kona-ba istória, sira ne’ebé uluk ona ne’ebé ho sakrifísiu barak harii no konsolida ona rai ida ne’e,” nia hateten.
Nune’e, foinsa’e sira hotu iha liberdade ne’e atu iha kapasidade organiza ninia aan ba future liuliu hatene aprende valor fraterndade umana.
“No, fraternidade, sai maun-alin la’ós sai inimígu ba malu. Respeita malu no diferensa atu aprende no respeita malu, diferensa ne’e sim, ódiu la’e,” nia hateten.
Notísia Relevante: “Joven ne’ebé lahatene mehi, joven ne’e hanesan reforma ona husi moris”
Jornalista : Nelson de Sousa
Editór : Cancio Ximenes
