OÉ-CUSSE, 20 Setembru 2024 (TATOLI) – Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lopes Lemos, entrega meza no kadeira hamutuk unidade 60 ba Eskola Sekundária Jerál (ESJ) Baqui iha Rejiaun Administrativa Espesiál Oé-Cusse Ambeno (RAEOA).
Iha serimónia ne’e, Sekretáriu Estadu agradese ba autoridade RAEOA, liuliu ba Sekretaria Rejionál Edukasaun no Asuntu Sosiál, tanba durante ne’e tau-matan ba eskola sira iha Oé-Cusse no la taka dalan mós ba Ministériu Edukasaun atu responde diretamente ba preokupasaun eskola sira iha rai-ketan ne’e.
Notísia relevante: Matéria lima iha ESG Baqui Oé-Cusse laiha profesór
Governante ne’e fundamenta katak durante ne’e Ministériu Edukasaun sempre bá halo monitorizaun no dalaruma fó apoiu la tuir nesesidade ne’ebé eskola sira presiza, maibé fó uitoan tanba eskola barak mak presiza tulun husi Governu.
“Tanba ne’e, ohin, ami vizita imi iha eskola Baqui, la lori buat barak, maibé lori kedeira balun no meza, nune’e tulun estudante sira tanba durante uza mak kadeira ai, maibé ohin ita lori fali modernu sira mai. Bá oin ami aumenta no sei foku ba enisnu tékniku vokasionál sira”, Domingos Lemos hateten ohin.
Nia husu ba profesór sira persiza koopera no konsentra hodi eduka alunu sira ba dalan ne’ebé di’ak no gia sira hodi dezenvolve rai ida ne’e iha futuru.
Notísia relevante: ESG Baqui devolve osan matríkula $1.030 ba inan-aman sira
Iha fatin hanesan, Diretór Rejionál Rekursu Umanu no Finansa ba Edukasaun Oé-Cusse, Sebastião Ico, agradese ba Ministériu Edukasaun tanba bele hili eskola ida husi Oé-Cusse hodi fó kadeira no meza.
“Bele mai to’o fatin ida ne’e hodi haree diretamente konsidaun eskola nian no rona mós preokupasaun manorin sira-nian, liuliu apoiu ne’ebé ohin oferese ona hanesan kadeira no meza ba eskola ida ne’e”, nia realsa.
Adjuntu Diretór ESJ Baqui, José António Abi, promete sei kuidadu mobiliáriu eskolár ne’e atu uza ba tempu naruk.
“Ami-nia eskola daudaun ne’e falta kadeira no meza, balun aat ona no balun sei di’ak. Ami agradese tanba tinan hirak bá kotuk Estadu ajuda ona harii eskola foun ida iha ne’e. Ohin, Governu mai apoia tan kadeira no meza, ida-ne’e ami sei tau-matan didi’ak atu uza ho kuidadu no ho responsabilidade, katak estudante ida tenke kuída nia kadeira tanba foun”, nia hateten.
Notísia relevante: Servisu Edukasaun seidauk presta atensaun másima ba ensinu rekorrente iha Oé-Cusse
Eskola Baqui daudaun ne’e iha estudante hamutuk 663 no profesór na’in-24 no iha eskola paralelo rua ne’ebé lokaliza iha sub-rejiaun Oésilo mak Eskola Sekundária Puinbeno iha suku Usitasae ho alunu 214, no eskola Leobeno iha suku Bobometo ho nia alunu hamutuk 200.
Jornalista: Abílio Elo Nini
Editora: Maria Auxiliadora
