DILI, 02 outubru 2024 (TATOLI)—Reprezentante povu iha uma fukun Parlamentu Nasionál (PN) liuhusi Deputadu PLP, Helder Freitas “Kamarudi’’, husu Sekretária Estadu Arte no Kultura (SEAK) atu fó apoiu ba komunidade hodi bele konstrui fali uma-lisan hamutuk 12 ne’ebé ahí han mutuk iha aldeia Maucale, suku Gariuai, postu administrativu Baucau Vila, munisípiu Baucau.
Notísia Relevante: SEAK husu família vítima ahi-han uma-lisan iha Gariuai prepara relatóriu hodi hetan apoiu
“Husu ba Sekretária Estadu Arte no Kultura (SEAK) buka forma oinsá bele apoiu ba vítima sira hodi konstrui fila-fali uma-lisan sira-ne’ebé ahí han,” nia hateten iha uma fukun Parlamentu Nasionál.
Nia bolu atensaun liuliu ba autoridade lokál no autoridade seguransa hodi buka tuir motivu loloos husi akontesimentu inséndiu ne’ebé estraga uma-lisan hamutuk 12 ne’e.
Nia dehan, tuir kronolojia ahí han mutuk uma-lisan 12 iha aldeia Maucale, suku Gariuai, postu administrativu Baucau Vila, munisípiu Baucau iha 23 setembru 2024, maizamenus iha tuku 13h30 loron manas (meudia).
Akontesimentu ne’e deskonfia ema deskoñesidu sunu-rai besik uma-lisan oin, no anin be suut (huu) lori da’et to’o ahí han uma-lisan Gialeu, Bercoli no Kaiono nian hamutuk 12 ne’e to’o mutuk.
Notísia Relevante: Inséndiu estraga uma-lisan 12 iha Gariuai
Jornalista : Nelson de Sousa
Editór : Cancio Ximenes
