OÉ-CUSSE, 05 Dezembru 2024 (TATOLI) – Uma-kain neen ne’ebé hela iha resintu edifísiu administrasaun Nítibe, iha suku Bene-Ufe, husu indemnizasaun ba autoridade Rejiaun Administrativa Espesiál Oé-Cusse Ambeno (RAEOA) antes muda sira hodi konstrui edifísiu foun iha fatin ne’e.
Eis-Jestór sub-rejiaun Nítibe, Teodoro Sila, dehan família sira-ne’e maske hela iha rai Estadu dezde 2004, maibé presiza konsidera sira molok hasai.
“Ita-nia família balun sei hela iha resintu edifisíu postu administrativu Nítibe, prosesu ne’e uluk hahú husi ha’u, maibé tanba ha’u-nia mandatu hotu, entaun nia prosesu seidauk kontinua. Iha uma-kain neen mak sei hela iha ne’ebá”, Teodoru Sila dehan iha ámbitu diálogu abertu ho Prezidente Autoridade REAOA, Rogério Tiago Lobato, iha postu saúde Manán, kuarta ne’e.
Notísia relevante: Autoridade RAEOA presiza konsidera uma-kain neen ne’ebé okupa administrasaun Nítibe
Nia lembra katak, antes ne’e, família sira-ne’e hato’o ona sira-nia karta pedidu ba autoridade anteriór, maibé iha autoridade foun ne’e seidauk hatene nia prosesu kontinuasaun.
“Hato’o ba prezidente autoridade atu família sira-ne’ebé sei hela, sira bele hamamuk ona fatin ne’e. Família sira mós halo uma uza osan rasik, entaun ita labele hasai sira ho obrigatóriu, maibé hanoin oinsá bele fasilita sira materiál ou osan para sira bele muda husi komplexu laran atu fó espasu ba futuru karik harii buat ruma”, nia rekomenda.
Agustinho Mese ne’ebé hela iha resintu administrasaun Nítibe salienta katak sira hela tinan barak iha fatin ne’e antes harii edifísiu administrasaun nian. “Ami-nia uma halo ona, tanba balun hela dezde 2004, ha’u rasik hela iha 2013. Agora, ami atu sai bá hela tan iha ne’ebé? Tanba ne’e, ami husu sei bele apoia netik ami atu halo fali uma iha fatin seluk”, nia hato’o.
Notísia relevante: Autoridade RAEOA inaugura edifísiu administrasaun Nítibe
Hatán ba preokupasaun sira-ne’e, Prezidente Autoridade RAEOA, Rogério Tiago Lobato, promete sei rezolve fazeadamente, tanba projetu barak mós seidauk hetan pagamentu.
“Ami mai ne’e simu de’it tusan ne’ebé administrasaun sira uluk halo ona. Tanba ne’e, rekomendasaun no pergunta sira hato’o ne’e ha’u-nia tékniku sira rejista ona atu tau-matan no rezolve iha futuru. Balun ita rezolve uluk, depois mak kontinua ba seluk”, nia dehan.
Jornalista: Abílio Elo Nini
Editora: Maria Auxiliadora
