OÉ-CUSSE, 06 Dezembru 2024 (TATOLI) – Kada tinan populasaun iha suku Bene-Ufe, sub-rejiaun Nítibe, sempre afeta ba inundasaun, tanba ne’e sira husu ba Autoridade Rejiaun Administrativa Espesiál Oé-Cusse Ambeno (RAEOA) atu konstrui gabiaun iha mota Saku.
Jestór sub-rejiaun Nítibe, Agustinho Afulit, dehan iha suku ne’e sempre enfrenta problema rua mak inundasaun no falta bee-moos.
“Tinan barak ona dezde Indonézia nia tempu suku ida-ne’e enfrenta problema bee-moos. Problema seluk mak husi suku Suni-Ufe mai to’o Bene-Ufe, Citrana, presiza tau gabiaun ba mota sira, tanba kada tinan suku rua ne’e enfrenta problema inundasaun, mota sobu komunidade nia uma, to’os no natar”, Jestór sub-rejiaun Nítibe, Agustino Afulit, informa iha ámbitu diálogu ho Prezidente Autoridade RAEOA, Rogério Lobato, iha aldeia Manán.
Notísia relevante: Abitante Bene-Ufe husu Agrikultura Oé-Cusse vasina animál sira
Nia salienta katak mota Saku ne’e, tinan barak ona, fó ameasa ba populasaun sira, tanba família barak mak lakon ona sira-nia uma, natar barak falla atu kolleta, tanba mota ne’e laiha nia dalan.
“Tanba ne’e, ami husu sei bele konstrui gabiaun, nune’e bele sátan netik bee hodi la’o tuir nia dalan”, nia hateten.
Lia-na’in aldeia Manán, suku Bene-Ufe, António Neno, reforsa katak iha aldeia Manán maioria ema hemu bee-mota, maibé tempu udan sira labele bá kuru tanba fo’er.
“Bee-matan iha maibé iha foho, bainhira ONG sira tama mai, ami hatudu atu kanaliza mai, maibé sira dehan labele tanba distánsia dook kuaze kilómetru neen kedas. Entaun, solusaun ami halai bá kuru iha mota, maibé kuandu udan hanesan ne’e ami labele konsumu ho di’ak tanba fo’er”, nia reitera.
Tanba ne’e, António Neno husu ba autoridade atu iha futuru halo perfurasaun ba bee-moos ida iha suku Bene-Ufe, tanba rai tetuk no bee barak iha rai-okos.
“Autoridade sira uluk mai vizita iha ne’e, ami mós hato’o maibé la realiza. Ami espera ho autoridade ne’e sei bele kee bee-posu ida atu kanaliza ba suku Bene-Ufe tomak”, nia sujere.
Notísia relevante: Sekretáriu Saúde Rejionál solusiona problema falta bee-moos iha Postu Saúde Bitila
Hatán ba lamentasaun sira ne’e, Prezidente Autoridade RAEOA, Rogério Lobato, hateten prezensa autoridade RAEOA iha suku atu rona komunidade nia lian, hanesan abitante iha Pássabe no Oésilo hato’o ona.
“Ha’u mai la’os fó kedan solusaun, maibé sei haree faze pur faze. Ezemplu, bee-moos ba postu saúde ne’e importante, kona-ba perfurasaun ne’e ha’u sei ko’alia ho Diresaun Infraestrutura atu haree ida-ne’e, inklui muru protesaun ka gabiaun. Importante mak hakerek iha karta, hato’o pedidu mai saida mak presiza atu haree. Kuandu osan iha ita bele rezolve”, nia garante.
Notísia relevante: Populasaun Bene-Ufe aprezenta preokupasaun ba Rogério Lobato
Tuir Sensu Uma-Kain 2022, suku Bene-Ufe akumula família 640 ho totál populasaun 3.164, ne’ebé mai husi aldeia Manán, Lamasin no Citrana.
Jornalista: Abílio Elo Nini
Editora: Maria Auxiliadora
