BOBONARO, 09 dezembru 2024 (TATOLI) – Juventude suku Tapo-Memo, postu administrativu Maliana, munisípiu Bobonaro, domingu ne’e ho inisiativa rasik realiza eventu desportu Natál Cup modalidade rua hansan futeból totál klubu 15 no voleiból klubu neen.
Prezidente Komisaun Organizadora, Fernando Raul, esplika, eventu ne’e realiza atu hametin lasu amizade hodi kria pas entre joven sira iha suku laran.
Notísia elevante: PM Xanana inaugura sentru sosiál Padre Manuel Nunes iha Tapo-Memo
“Atu sira labele kria tán konflitu ka problema ne’ebé mak sira halo ona, objetivu ida fali tán mak atu anina ita-nia inan-aman, komunidade ein jerál iha suku ida-ne’e, ami-nia esperansa ba oin katak ho atividade ne’e bele motiva ona joven sira atu husik hela pasadu ho problema ne’ebé loloos la apoia sira-nia vida, maibé mai hamutuk dezenvolve suku ida ne’e, ida tan mak ho tinan foun mai bele lori inovasaun foun, hanoin foun, pas no fraternidade iha suku,” nia informa ba Jornalista sira iha kampu Futeból suku Tapo-Memo
Biban ne’e, Xefe suku Tapo-Memo, Joaquim Baptista, apela ba jogador sira atu joga ho pas no dame.
“Atu nune’e ita selebra Natál ho kontente hamutuk, tanba durante ne’e desportu iha ita nia suku vakum,” nia katak.
Sorin seluk, Prezidente Asosiasaun Futeból Munisípiu Bobonaro, Marcal dos Santos, apresia ho inisiativa juventude suku Tapo-Memo no konsidera liu husi eventu ne’e bele prepara jogador ho prestasaun di’ak.
“Ha’u atu hateten de’it lapangan ida ne’e mak haboot ha’u, halo ha’u koñesidu ba joga to’o iha nasionál, ne’ebé ha’u hanoin ita tenta apoia malu nafatin, karik proposta sira ne’e ami nia kbi’it seidauk to’o ami seidauk realiza hotu, ba oin ita sei hamutuk nafatin ami prontu apoia imi,” nia hateten.
Enkuantu jogu ne’e realiza ho fundu husi emprezariu lokál, internasionál no komunidade sira iha suku Tapo-Memo.
Notísia relevante: AFB halo hela preparasaun ba jogu rejionál sub-17
Jornalista: Sérgio da Cruz
Editór: Evaristo Soares Martins
