Progresu konstrusaun uma ba vítima inséndiu iha Uistasa’e atinje ona 50%
OÉ-CUSSE, 31 Janeiru 2025 (TATOLI) – Komandante Operasionál Autoridade Protesaun Sivil (APC) Rejiaun Administrativa Espesiál Oé-Cusse Ambeno (RAEOA), João Sila, informa, daudaun progresu konstrusaun uma ba vítima sira-ne’ebé hetan inséndiu hamutuk uma-kain 12 iha suku Usitasa’e atinje ona 50%.
“Inséndiu ne’ebé akontese tinan kotuk, iha aldeia Buqui suku Usitasa’e ahi-han motuk uma-kain-12, hafoin Governu liuhusi Sekretáriu Estadu Protesaun Sivil (SEPS) apoia ona meteriál konstrusaun sivíl halo rekuperasaun. Atuál APC Oé-Cusse iha responsabilidade atu halo monitorisaun, ne’ebé nia progresu obra sei la’o hela. Seidauk finaliza foin besik 50%, ne’ebé APC sei kontinua monitoriza nafatin to’o hetan sertifikadu husi Governu,” informa Komandante Operasionál ne’e, bainhira hala’o fizkalizasaun hamutuk ho Asesór Prezidente Autoridade RAEOA ba Asuntu Sosiál, Agustinho Caet, iha aldeia Buqui suku Usitasa’e, ohin.João Sila, informa hafoiniha Oé-Cusse, ohin.
Notísia relevante:Vítima inséndiu Usitasa’e simu materiál konstrusaun husi SEPS
Progresu atinje ona 50% mak hanesan finaliza ona sinta kraik no mós hasa’e ona bataku.
“Materiál konstrusaun kompletu ona tanba apoia direita husi SEPS, maibé foin daudaun iha problema oituan ba eletrisidade ne’e mak konstrusaun atraza oituan, maibé agora dada ona, ne’ebé ha’u fiar to’o marsu abríl bele ramata,” nia dehan.
Molok ne’e, Governu liuhusi SEPS informa ba vítima sira katak uma-kain sira ne’e sei hetan mós osan maun de obra $1.000, maibé to’o agora Governu seidauk entrega tanba presiza dokumentu.
“Osan ne’e ba maun de obra, atu halo prosesu rekuperasaun to’o ramata, maibé osan ne’e seidauk bele simu, tanba komunidade sira-nia dokumentu balun sei prosesu tratamentu hela, hanesan kartun eleitorál, billete identidade no sertidaun RDTL. Tanba nasionál mós hein hela dokumentu sira-ne’e, tanba osan Estadu entaun atu foti presiza dokumentu sira-ne’e,”nia afirma.
Iha fatin hanesan, Xefe Suku Usitasa’e, Tomas Ulan, hateten, nia parte esforsa no submete ona vítima sira-nia dokumentu iha notariadu konservatóriu Oé-Cusse STAE, maibé sei iha prosesu nia-laran.
“Agora falta sira-nia dokumentu ha’u mós submete maibé agora sei iha prosesu nia laran, parese Fevereiru mak foin bele ba foti balu iha notariadu no balu iha STAE,” nia hateten.
Notísia relevante:Inséndiu iha Usitasa’e, Palmira Mala lakon osan $6.400
APC no parseiru apoia ona nesesidade bázika ba vítima inséndiu iha Usitasa’e
Jornalista: Abílio Elo Nini
Editór: Florencio Miranda Ximenes
