OEKUSI, 10 Fevereiru 2025 (TATOLI) – Kandidatu Xefe suku iha Kutete, Sub-Rejiaun Pante Makasar, Rejiaun Administrativa Espesiál Oekusi Ambenu (RAEOA), José António Bana, eleitu sai xefe suku ba períodu 2025 to’o 2031.
Responsável Tékniku iha STAE Oekusi, Grigório do Santos Neno, informa, eleisaun orgaun suku iha kutete, kandidatura rua mak konkorre, ho númeru sorteiu 01 husi Benjamin Bana no númeru sorteiu 02 mak José António Bana.
Notísia relevante:Abitante Kutete ho esperansa xefe suku eleitu garante pás no estabilidade
“Rezultadu provizória ne’ebé STAE simu husi sentru votasaun rua, mak hanesan númeru 01 hetan votu 422 no númeru 02 hetan votu 430, ne’ebé liu de’it na’in-ualu, Aban mak foin ita halo apuramentu finál iha sede suku Kutete,” nia relata Ajénsia Tatoli,I.P iha sentru votasaun Mahata, ohin.
Tuir kontajen rezultadu husi sentru votasaun rua mak hanesan, iha Mahata kandidatu númeru 01 hetan votu 306 no númeru 02 hetan votu 285, laiha votu nulu no branku. No iha sentru votasaun Kutete, kandidatu númeru 01 hetan votu 116 no númeru 02 hetan votu 145, laiha votu nulu no branku ho totál eleitór iha suku Kutete hamutuk 852.
Notísia relevante:Eleisaun suku iha Kutete hakat ba segunda volta
Eleisaun autoridade suku iha Oekusi iha sentru votasaun Kutete no Monemeko, maibé prosesu kontajen votasaun iha suku Monemeko enfenta problema kona-ba rede telekomunikasaun, nune’e susar atu fasilita informasaun husi baze mai iha STAE.
Biban ne’e, Xefe Suku eleitu, José António Bana, agradese no respeita konfiansa ne’ebé povu fó no sei kontinua servi povu ho di’ak.
“Desizaun ne’e povu mak deside, maibé ba ha’u karik fó fiar liu mai ha’u prontu atu lidera suku Kutete, ho kompromisu katak, ha’u sei la halo diskriminasaun ba povu maibé trata ema hotu ho dignu,” nia promete.
Tuir observasaun durante eleisaun la’o iha suku Kutete la’o ho di’ak tanba hetan apoia seguransa másimu husi Polísia Nasionál Timor-Leste (PNTL), no hetan mós supervizaun husi Komisaun Nasionál Eleisaun (CNE).
Notísia relevante:Profíl suku pilotu Kutete Oé-Cusse
Jornalista: Abílio Elo Nini
Editór: Florencio Miranda Ximenes
