Komandante UPF vizita EBF Mabil-oa hametin amizade entre PNTL ho estudante

BOBONARU, 11 fevreiru 2025 (TATOLI)—Komandante Unidade Patrullamentu Fronteira (UPF), Superintendente Polisía Euclides Bello, tersa ne’e, ho ekipa halo vizita ba Eskola Ensinu Báziku Filiál (EBF) Mabil-Oa, suku Saburai, postu administrativu Maliana, munisípiu Bobonaru.

Notísia Relevante: Komandante Euclides observa projetu reablitasaun postu UPF 41

Komandante UPF ne’e hateten, vizita ne’e nu’udar pasu importante ida atu hametin lasu entre polísia no komunidade, liuliu estudante ka jerasaun foun no espera katak mensajen ne’ebé hato’o bele inspira estudante sira atu sai sidadaun ne’ebé responsável, badinas iha estudu no kontribui ativamente ba dezenvolvimentu Timor-Leste.

“Objetivu prinsipál husi vizita ne’e mak atu hametin kolaborasaun entre polísia, dirijente eskola no alunu sira, hodi dissemina informasaun kona-ba papel UPF-PNTL nian ba estudante sira,” Superintendente Polisía Euclides Bello hateten ba estudante sira, tersa ne’e.

Vizita ne’e nu’udar parte husi atividade komemorasaun aniversáriu PNTL ba da-25, ne’ebé sei selebra iha 27 Marsu 2025 ho tema “Hamutuk Mak Dalan ba Dezenvolvimentu Estadu RDTL.

Aleinde ne’e, nai dehan, vizita ne’e mós reflete kompromisu PNTL nian atu servisu hamutuk ho komunidade hodi harii futuru ne’ebé di’ak-liu iha Timor-Leste.

Tanba ne’e, Superintendente Euclides Bello, hato’o hela mensajen inspirativu ba estudante sira mak xave susesu lima (5) ne’ebé importante ba jerasaun foun sira atu moris banati hodi bele hetan susesu iha loron aban.

“Aban bainrua imi mak sei troka ami, tanba ne’e tenke estuda didi’ak. Ha’u fó hela mensajen ba alin sira atu sai susesu di’ak-liu ami maka ne’e; Primeiru, tenke fiar maromak; segundu, tenke fiar inan-aman; terseiru, tenke Kultura; kuartu, tenke fiar edukadór sira; lima, fiar leí. Pontu lima ne’e mak importante atu ita feto no mane sai susesu iha futuru mai. Tanba ne’e, tenke sadik ita nia-aan, ho ita-nia paixaun, ho ita-nia hanoin katak ha’u tenke sai mellór estudante iha ne’e no iha ne’ebé de’it. Entaun, tenke aprende beibeik, lee-barak, estuda, tenke iha talentu barak,” nia dehan.

Ho nune’e, nia esplika, estudante sira atu hetan susesu iha future ne’e tenke kaer-metin ba xave susesu importante lima (5) mak hanesan;

1. Fiar Maromak: Hametin ita-nia fiar no valór espirituál nu’udár matadalan iha iha moris loro-loron.
2. Fiar Inan Aman: Rona no respeita ita-nia inan-aman sira, tanba sira mak hun no abut ba ita-nia moris.
3. Fiar Kultura: Valoriza no promove ita-nia kulturaTimor-Leste nian, nu’udar rikusoin ida ne’ebé úniku.
4. Fiar Edukadór sira: Respeita no aprende husi ita-nia profesór sira, tanba sira mak sei prepara ita ba futuru.
5. Fiar Lei sira: Kumpre lei no regulamentu sira, hodi garante orden no armonia iha sosiedade nia leet.

Iha biban ne’e, Koordenadór EBF Mabil-oa, Carmindo Lopes, hato’o agradesimentu tanba tanba foin primeiravés PNTL vizita eskola ne’e no konsidera mensajen ne’ebé komandante UPF hato’o ne’e importante tebes no sai bukae ida ba estudante sira atu moris banati.

“Ami nu’udár manorin mós sei esforsu nafatin, atu nune’e ami-nia alunu sira mós iha kualidade bazeia ba komandante nia mensajen sira-ne’e. Ami mós enkoraja nafatin liafuan hirak ne’e atu nune’e sira bele estuda makaas liután,” nia dehan.

Enkuantu, totál estudante tinan letivu 2025 ne’ebé Partisipa iha ensinu no aprendizajen iha eskola ne’e hamutuk 261 ne’ebé mai husi Ensinu Báziku Primeiru to’o segundu siklu.

Notísia Relevante: PNTL sei koloka ofisiál polísia eskola na’in-rua ba ESG Dom Martinho-Malibaca

Jornalista : Sérgio da Cruz    

Editór         : Cancio Ximenes