BOBONARU, 18 Marsu 2025 (TATOLI)—Agrikultór sira husi suku Tapo-Memo, postu administrativu Maliana, munisípiu Bobonaru, preokupa no konsidera distribuí ai-moruk pestisida husi Ministériu Agrikultura Pekuária, Peska no Floresta (MAPPF) atraza tanba hare barak iha natar laran ne’e peste Karakól estraga no to’o agora MAPPF seidauk halo intervensaun.
Notísia Relevante: Peste Karakól hahú ataka hare iha Ritabou
Agrikultór no natar-na’in, Barnabe Barreto, sente triste tanba iha epoka dahuluk tinan ne’e seidauk hetan apoia ai-moruk husi Governu.
“Ami balun iha osan ne’e sei sosa hodi prevene peste sira-ne’ebé estraga hare, la hein husi Estadu maibé balun ne’ebé laiha osan ne’e araska. Agora dadauk hanesan ne’e mak ai-moruk mai ne’e buat hotu liu tiha ona, karakól han tia hotu ona. Se loloos ne’e Gradi tiha rai, rega uluk lai ai-moruk, para peste ne’e labele estraga hare,” Nia informa ba jornalista sira iha terrenu, tersa ne’e.
Aleinde Natar-Nain, Mario Lopes, hateten tinan ne’e natar barak mak falla kolleta no abandonadu tanba peste nia populasaun kuaze invade terrenu produtivu ne’ebé durante ne’e natar-na’in sira utiliza ba produsaun hare.
“Karakól ne’e dezde tinan hirak kedas Estadu la tau-matan to’o ohin loron. Povu balun soe ninia rai to’o abandona hotu rai iha kraik ne’ebá ne’e, pelumenus rai ne’e ektare 400 to’o 500 mak abandona hela ne’ebá ne’e, la halai natar tanba Karakól,” nia hateten.
Agrikultór no natar-na’in, Xavier Tae-Mau, komfirma hahú husi tinan 2017 to’o 2024 kuantidade produsaun hare menus tanba hare ne’ebé kuda iha natar laran ne’e atake husi peste Karakól.
“Uluk iha 2007, 2008, 2010 mai to’o 2012 e’e, rai ektare ida ita hetan karon 60, 80 balu to’o 100 hanesan ne’e. Agora Karakól iha ne’e, hare laiha de’it, rai ektare ida pelumenus ne’e ita kuandu sura karon kilograma 50 ne’e hanesan to’o saka 20, lae saka 18, la sa’e liu ida-ne’e,” nia dehan.
Ba kestaun ne’e, jornalista Tatoli halo konfirmasaun liuhusi WatsApp (WA) ho diretór Servisu Munisipál Agrikultura, Autoridade Munisípiu Bobonaru, Longuinhos João, maibé la responde.
Enkuantu, antes ne’e, Diretór Longuinhos João, deklara katak Diresaun Servisu Munisipál Agrikultura, Munisípiu Bobonaru submete ona pedidu ba MAPPF atu apoia ai-moruk Pestisida hadi halo intervensaun sedu.
Notísia Relevante : Peste Karakol hahú ataka natar ektare 300 iha Maliana
Jornalista : Sérgio da Cruz
Editór : Cancio Ximenes
