OEKUSI, 27 Marsu 2025 (TATOLI) – Autoridade Rejiaun Administrativa Espesiál Oekusi Ambeno (RAEOA), kinta ne’e, hatuur fatuk dahuluk ba konstrusaun kazerna membru Polísia Nasionál Timor-Leste (PNTL) Eskuadra sub-rejiaun Pássabe.
Projetu ne’e implementa husi empreza Sil-Noni Unipesoál Lda, ho obra ne’e nia medida 15×16 kompleta ho kuartu 11, no valór orsamentu $178,052.28 ho durasaun servisu fulan-neen.
Notísia relevante:Kazerna PNTL Eskuadra Pássabe la dignu ba membru sira atu hela
Iha seremónia lansamentu ne’e, Sekretáriu Rejionál ba Asuntu Terra Propriedade, Marcelino Marques Coro, reprezenta Prezidente Autoridade RAEOA, rekomenda ba empreza konstrutor atu ezekuta projetu ne’e ho kualidade no kumpre Bill of Quantity (BoQ) .
“Projetu ne’e mai husi Autoridade no fó konfiansa ba kompañia Sil-Noni Lda atu hala’o konstrusaun, nune’e ami husu no rekomenda katak servisu tenke garante kualidade obra no kumpre saida mak dezeña ona iha BoQ, nune’e iha futuru ita bele kontinua hetan konfiansa nafatin atu ka’er projetu seluk iha Oekusi,” nia apela iha ámbitu lansamentu iha suku Abani, ohin.
Iha fatin hanesan, Diretór Diresaun Rejionál Infraestrutura, Remígio Nuno Sila, esplika projetu ne’e ho tipu emerjénsia ne’ebé aprova husi Konsellu Administrasaun Fundu Infraestrutura (KAFI) Rejionál.
Tanba iha tinan kotuk 2024, bainhira Prezidente RAEOA hala’o vizita ofisiál ba povu sub-rejiaun Pássabe, komunidade bo autoridade lokál sira rekomenda presiza halo konstrusaun foun, tanba kazerna PNTL ne’ebé eziste nu’udar obra antigu dezde tempu okupasaun.
“Projetu ne’e konstrui tanba rekomendasaun mai husi komunidade Pássabe no Komandu eskuadra sub-rejiaun Pássabe, tanba kondisaun kazerna anteriór grave no hatudu imajén ladi’ak, entaun presiza hadi’a ona, tan ne’e mak liuhusi Prezidente Autoridade rekomenda no deside integra iha KAFI rejionál datoluk nu’udar projetu emerjénsia atu konstrui iha tinan ne’e,” nia hateten.
Entretantu, Xefe suku Abani, Carlos Elo hato’o agradesimentu ba Autoridade RAEOA tanba preokupasaun ne’ebé hato’o konsege hetan resposta imediata.
“Agradese ba Autoridade RAEOA tanba iha tinan kotuk ami rekomenda no ohin responde ona ami-nia preokupasaun tanba durante tinan barak ho seguransa sira iha ne’e susar tebes, tanba hela ho kazerna antigu, ne’ebé la merese liu atu ita ema hela iha uma ne’e no hatudu imajen ladi’ak ba públiku,” nia orgullu.
Notísia relevante:Komandu Jerál planu hadi’a kazerna PNTL Eskuadra Pássabe
KAFI Oekusi aprova projetu emerjénsia 26 ho kustu millaun $36-resin
Jornalista: Abílio Elo Nini
Editór: Florencio Miranda Ximenes
