DILI, 28 Marsu 2025 (TATOLI)-Reitór Universidade Nasionál Timor-Lorosa’e (UNTL), João Soares Martins, hateten estudante no profesór sira iha UNTL kontinua promove atividade peskiza sira.
Nia dehan ba fundu ne’e Institutu Nasionál Siénsia Teknolojia (INCT) no husi universidade balun mak konkorre ba fundu esterna hanesan ONG no universidade parseria husi rai li’ur.
Reitór hatete, kona-ba peskiza ne’e, esforsu ida husi UNTL atu halo, la’ós de’it halo peskiza, maibé oinsá atu tradús pensamentu sira ba livru ida, tu nune’e pensamentu di’ak, la hela de’it iha estudante no profesór sira nia kakutak, maibé tranzmite ba jerasaun foun sira.
Notísia relevante: UNU-IIGH koopera ho UNTL halo peskiza kona-ba impaktu mudansa klimátika ba saúde
“Ita promove atividade peskiza, konserteza ita limitasaun orsamentál, maibé profesór no estudante sira bele halo peskiza, ne’e rekizitu obrigatóriu sira tenke halo monografia, entaun tenke peskiza, no profesór sira mós sempre halo peskiza, ba fundu INCT no husi universidade rasik, balun konkorre fundu hanesan ONG no universidade parseria husi rai li’ur”, dehan João Martins ba jornalista sira iha auditóriu Fakuldade Siénsia Sosiál, Kaikoli, sesta ne’e.
Tanba ne’e, atividade peskiza ne’e estudante no profesór sira kontinua promove, maske limitadu orsamentu.
“Peskiza ne’e depende kada projetu, balun tinan-ida no balun bele fulan-tolu ka fulan-haat no balun bele lori-tempu naruk uitoan, natureza peskiza la hanesan, no disponibilidade mós ba orsamentu”, dehan nian.
Notísia relevante: BCTL no UNTL asina nota entedimentu ba peskiza konjunta iha área ekonomia
Jornalistra : Osória Marques
Editora : Rita Almeida
